Hegoafrika
Botoen %54 eskuratu ditu agintean den Afrikako Kongresu Nazionalak
Botoen %30 zenbatu dituzte orain arte. Datu horien arabera, hautesleen %26k egin dute oposizioko Aliantza Demokratikoaren alde.
Nelson Mandelaren ANC Afrikako Kongresu Nazionalak eskura du garaipena. Botoen %30 zenbatuta, duela lau urteko emaitzetatik hamar puntura dago alderdia, botoen %54 eskuratuta. Oposizioko Aliantza Demokratikoak, berriz, botoen %26 lortu ditu, lehen datuen arabera. Lehian hirugarren tokian geratu da ezkerreko EFF Askatasun Ekonomikoaren Borrokalariak taldea, %8rekin.
Parte hartzea handia izan da. Hautesleen bi herenek hartu dute parte Legebiltzarreko eta eskualdeetako hauteskunde hauetan. Cyril Ramaphosa presidentea izan da horietako bat. Botoa ematerakoan estatuburuak aitortu du ekonomiaren gainbehera eta ustelkeria izan direla ANCren gainbeheraren arrazoi nagusiak.
Apartheid sistemaren aurka egiteagatik egin zen ezagun ANC mundu osoan, baina ordutik urte asko igaro dira, eta, Mandela buru zuen alderdia 1994tik agintean bada ere, haren ospeak behera egin du nabarmen. Hegoafrikan langabezia %28 da, eta gazteek zailtasun handiak dituzte lana aurkitzeko. Asko dira uste dutenak ANCk bere mesedetan erabili duela diru publikoa.
Goizeko buletina
BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.
