Euripean aritu dira txirrindulariak bosgarren etapa osoan, eta horrek eragina izan du, arriskurik ez baitute hartu nahi izan. Eguneko ihesaldia izan da, sei txirrindulariz osatutakoa, baina tropelak banaka harrapatu ditu guztiak. Azkenean, esprintean erabaki da, eta Ackermann (Bora) indartsuena izan da berriro. Fernando Gaviria (UAE) eta Arnaud Demare (Groupama) sailkatu dira bere atzetik. Sailkapen nagusian, ez da aldaketarik lehen postuetan, eta Primoz Roglicek (Jumbo) jarraitzen du lider.
Tom Dumoulin izan da eguneko protagonista. Italiako Giroko faborito nagusia zenak proba utzi du. Tom Dumoulinek (Sunweb) ezin izan dio minari eusti, eta bosgarren etapan irten den arren, ez jarraitzea erabaki du. Astearteko etapan eroriko gogorra izan zuen, eta zauri handia egin zuen izterrean. Lau minutu galdu zituen sailkapen nagusian, eta elastiko arrosaren lehiatik kanpo gelditu arren, jarraitzeko asmoa plazaratu zuen, etapen lehian sartzeko. Gorputzak, baina, ezetz esan dio, eta hasi eta berehala utzi du lehia.
Dumoulinek Giro irabazi zuen 2017an eta bigarren izan zen iaz. Faborito handiena zen askoren ustez, eta lehen eguneko erlojupekoan Primoz Roglicekiko (Jumbo) minutu erdi galdu ondoren oraindik lehia betean zegoen. Aurreko urteetan zortea izan du erorikoekin, aurten, aldiz, ez, eta bera izan da lehen astean hain ohikoak diren erorikoek sortu duten lehen hutsune entzutetsua.
Ez da Giroa utzi duen txirrindulari bakarra, UAE taldeak Juan Sebastian Molano kolonbiarra lehiatik kanpo utzi baitu. “Ezohiko emaitzak” eman ditu talde barneko dopin kontrol batean, eta emaitza horien iturria ezagutu arte baztertu egin dute.