Europako Giza Eskubideen Auzitegiak artxibatu egin du hamasei euskal presok Frantzian betetako zigorrak Espainiakoekin batzeko egindako eskaria. Lehen ere ebatzi izan du Estrasburgoko auzietegiak norabide horretan: 2018ko urrian, adibidez, Santiago Arrozpide, Alberto Plazaola eta Francisco Mujika euskal presoen kasuan. Frantziako kartzeletan betetako zigorra aintzat hartu eta zati hori egun betetzen ari diren zigorretik ken ziezaieten eskatu zuten, baina Estrasburgok erabaki Espainiak ez zuela eskubiderik urratu zigorrak betetzeko egindako kalkuluarekin. Aurtengo apirilean, bide berean ebatzi zuen Kepa Pikabearen eskaera ere.
Beste hemeretzi euskal presok ere jarria zuten salaketa, baina berri agentzien arabera, haiek erretiratzeko asmoa agertu zuten, aurreko ebazpenak ikusita. Gaur, Estrasburgok artxibatu egin ditu kasu horiek, argudiatuta ez dagoela Giza Eskubideen Ituneko eskubideei eragiten dien "egoera partikularrik". "Auzitegiak uste du ez dagoela justifikatuta eskariak aztertzen jarraitzea".
Europako Batzordeak zuzentarau bat onartu zuen 2008an, esanez Europako Batzordeko kide den edozein estatutan betetako zigorra aintzat hartu behar dela beste estatu batean bete beharreko zigorra kalkulatzeko. Hori bereziki garrantzitsua da euskal preso askoren kasuan, Espainian zigorra betetzen ari diren askok badituztelako Frantziako espetxeetan betetako zigorrak. Espainiak, ordea, muzin egin zion behin eta berriro Europatik etorritako irizpidea betetzeari. 2014ko abendura arte ez zuen agindua bete, eta zuzentaraua bere legerian txertatu zuenean, hainbat baldintza eta epe ezarri zituen Espainiak; praktikan, ezinezko egin zuen euskal presoek zigorra batzeko aukera izatea.