Azken hauteskundeetan lortutako salba-gerrikoetako bati —Madrilgo erkidegoa da bestea— tinko eutsi dio PPk, jakin baitaki Madrilgo alkatetza berreskuratzea berebizikoa zaiola, bai nolabaiteko hondoa jarri nahi badio alderdiaren azken urteetako gainbeherari, bai eta eutsi nahi badio Ciudadanosek borrokatzen dion Espainiako eskuinaren lidergoari.
PPko hautagai Jose Luis Martinez-Almeidak Ciudadanosen eta Voxen botoak jaso ditu eta Espainiako hiriburuko alkate izango da hurrengo lau urteetan. Salba-gerrikoa garaikur bihurtu da eta azkenean tranpolina bilakatuko dela dute PPn. Pablo Casadoren arabera, "gaur hasi da datozen hauteskundeekin Espainiara iritsiko den aldaketa".
Hauteskundeak Manuela Carmenaren Mas Madridek irabazi arren —hemeretzi zinegotzirekin— Madrilgoko Udala atzera eskuinarentzat izango zela nahiko argi zegoen, nahiz eta udalbatza osatu bezperaraino luzatu ziren eskuineko hiru alderdien arteko elkarrizketak. Adosteko gehienak Ciudadanosekin zituen PPk, baina ez bereziki politika edo programei buruzkoak, baizik eta karguei zegozkienak. Ciudadanos txandako alkatetza eskatzeraino iritsi zen —lehen bi urteetan PPko Martinez-Almeida izatea alkate, eta ondoren Ciudadanosko Begoña Villacis—, Albert Riveraren alderdiak jakitun baita Madrilgo alkateak duen proiekzio publiko eta politikoaz. Azkenean, Villacis Madrilgo alkateordea izango da.
Vox-en eragina
Ciudadanos lokaztu gabe uzteko, PPren eta Voxen artekoa izan da beste negoziazioa. Baina ez akordio horretan hitzartutakoen xehetasunik ez da ezagutzen. Adibidez, ez dago argi Voxeko zerrendaburu Javier Ortega Smithek ardurarik izango duen Martinez-Almeidaren gobernuak.