Mutiko bat hilda aurkitu zuten astelehen goizean Galea lurmuturraren inguruan, Getxon (Bizkaia). Bezperatik ari ziren haren bila, falta zela salatu baitzuen familiak. Uste dute bere buruaz beste egin zuela Galeako haitzartean. Ertzaintzak zabalik du ikerketa. Besteak beste, aztertzen ari da eskolan izandako arazoek eragin ote zuen gazteak bere buruaz beste egitea. 13 urte zeuzkan.
Eusko Jaurlaritzako Hezkuntza Sailak izana zuen gaztetxoaren berri orain baino lehen. Bullying-a jasaten ari zelakoan, salaketa bat jaso zuen. Hala baieztatu du Cristina Uriarte Hezkuntza sailburuak. Garai hartan, Erandion (Bizkaia) ari zen gaztea ikasten, Jado ikastetxean. Hain justu, eskola horrek ohar bat kaleratu zuen atzo, "dolumina" adierazteko. Hala ere, gertatutakoari buruzko argibiderik ez zuen eman ikastetxeak.
Uriarte sailburuak agerraldia egin du —gaitasun handiko ikasleei kasu egiteko plana aurkeztu du—, eta nerabearen suizidioaz galdetu diote. Xehetasun handirik ez du eman nahi izan, nabarmenduz ikerketa martxan dagoela eta adingabe bat dagoela tartean, argitu du, baietz, jazarpenagatik salaketa bat jaso zutela. "Printzipioz, bazirudien ez zegoela jazarpenaren frogarik, baina, hala ere, martxan jarri zen protokoloa. Esku hartu zen".
Ikastetxez aldatu egin zuten gaztetxoa. "Familiak eta ikastetxeak adierazi dutenez, ez zeukan inolako arazorik" nabarmendu du Uriartek. "Izatez, nota onak ateratzen ari zen".