Eguraldia lagun aurten Ehunmiliak mendi lasterketan

Zenbaki borobila da hamar; baita aurten Ehumiliak mendi lasterketak lortu dituenak ere. Orain arteko datu guztiak gainditu ditu: 1.295 parte hartzaile, 1.600 laguntzaile eta inoiz baino nazioarteko lasterkari gehiago. Gaur hasiko da lasterketa entzutesua: 18:00etan abiatuko da, Beasaindik (Gipuzkoa), eta ultra-trailari izena ematen diot Ehunmiliak (EHM) lasterketa izango da lehena: 168 kilometro eta 11.000 metroko desnibel positiboa ditu. 515 lasterkarik hartuko dute parte, horietatik 26 emakumezkoak. 18:00etan hasita, 48 ordu izango dituzte parte hartzaileek lasterketa amaitzeko. Kalkuluen arabera, bihar arratsaldean iritsiko da lehen korrikalaria, 16:00ak eta 17:00ak bitartean.

Ez da egunotan egingo den lasterketa bakarra. Goierriko Bi Handiak (G2H) eta Marimurumendi (MMM) lasterketak ere egingo dira. Handia da hiru probek mendi korrikalarien artean duten ospea. Goierriko Bi Handiak lasterketak 88 kilometroko ibilbidea du, eta 6.500 metroko desnibel positiboa. Kasu honetan ere dortsal guztiak agortu dira, eta 515 lasterkarik hartuko dute parte; 41 dira emakumezkoak. 23:00etan abiatuko da, eta, aurreikuspenen arabera, larunbat goizaldean iritsiko da lehen korrikalaria, 09:00ak aldera. 22 ordu izango dituzte lasterketa amaitzeko. Marimurumendi lasterketan, berriz, 42 kilometro egin beharko dituzte korrikalariek, 2.300 metroko desnibel positiboarekin. 265 lasterkarik hartuko dute parte, eta 49 dira emakumezkoak. Igandean abiatuko da, 08:00etan, eta 11:30ak aldera iritsiko da lehena.

Lehen aldiz dortsal guztiak amaitu arren, ez da nabarmen handitu emakumezkoen parte hartzea. Hiru ehuneko hazi dira zifrak: 116 dira aurten ultra-trailean parte hartuko duten emakumeak, lasterkari guztien %8,9 zehazki. Euskal herritarren kopuruari dagokionez, gero eta gehiago dira: 233 dira guztira, 225 gizonezko eta 8 emakumezko. Horietatik, 113 gipuzkoarrak dira, 72 bizkaitarrak, 22 arabarrak eta 15 nafarrak; antolatzaileek ez dute eman Ipar Euskal Herriko daturik; "Frantziatik" zazpi korrikalarik parte hartuko dute. Beste guztiak nazioartekoak dira: Espainia (148), Katalunia (86), Suedia (14), Portugal (12), Alemania, Andorra, Polonia eta Mexiko (bina) eta Belgika, Ingalaterra, Uruguai, Brasil, Txina, Guatemala eta Japonia (bana). 

Datuak datu, oinak astindu eta lasterketa hasteko gogoz daude korrikalariak, eta aurten, iaz ez bezala, eguraldia lagun. Gaurtik hasita, bi parke natural eta 30 udalerri baino gehiago igaroko dituzte korrikalariek, Ehunmiliak mendi lasterketa ospetsuaren txapelaren bila. Lasterketaren jarraipena eta nondik norakoak, Goierriko Hitzan irakurgai.