Albistea entzun

Erakusketa

Fernando Renes artistak azulejuekin estali ditu BilboArteko erakusketa aretoko paretak

Gerra, sexua eta bizipen propioak irudikatu nahi izan ditu harlauzetan marraztutako irudietan. Erakusketa irailaren 2tik 20ra arte ikusi ahal izango da, doan.

Fernando Renes, BilboArten instalatu berri duen mosaikoaren zati bat atzean duela
Fernando Renes, BilboArten instalatu berri duen mosaikoaren zati bat atzean duela Marisol Ramirez / FOKU

Amaia Igartua Aristondo -

2019ko abuztuak 30

“Zerbait berria egin nahi nuen”. Ez da Fernando Renes (Covarrubias, Burgos, Espainia, 1970) artista bisualak azulejua erabiltzen duen lehen aldia, baina oraingoan “proposamenaren altuera igo” nahi izan du. Erabakiaren emaitza, honako hau: BilboArteko Urazurrutia aretoko hormak estali dituen mosaikoa, 42 metro luze eta 2,7 metro altu dena. Bilboko Udalaren ekoizpen artistikoaren zentroan egin du egonaldia artistak 2018an, eta orduan garatutakoa bertan jarri du ikusgai, irailaren 2tik 20ra bitarte. 17:30etik 20:30era bisitatu ahal izango da, doan.

Renesek “energia negatiboa eta positiboa” agertu ditu harlauzetan; gerra eta sexua, hurrenez hurren. Elementu belikoekin uztartzen da lentzeria, eta, oro har, tradizioan jarri du arreta Renesek, “ikuspegi zabalagoa” emate aldera. “Inoiz baino informazio gehiago daukagu”. Irudietan antzeman daiteke gaur egun eskura duen hori aprobetxatu duela, modernoak eta zaharrak bat egiten baitute: hegazkinontzi mardularen ondoan, antzinako zalduna ikus daiteke, esaterako. Bere esperientzia ere gehitu dio artelanari, bere autoa marraztuz, adibidez.

Erabilitako materialak ere —zeramikak, alegia— atzera begira jartzen du ikuslea, hein batean: azulejuari esker, “artearen hasierekin” egiten du lotura Renesek. Baina harlauzek “harategi” giroa ere eransten diote obrari. “Haragia zintzilikatu beharrean, objektuak zintzilikatu ditut”. Besteen “jostailuen” inguruan hausnartzen du, eta haietako bakoitzari ematen zion balioaren inguruan: “Dena da kontsentsua”. Azulejua, esaterako, elementu “umil” gisa hartu izan da, baina Renesi obraren “bizkarrezurra” paratzeko aukera eman dio: marrazkia. “Paperarekin lauzatzen nuen lehen, azulejuarekin orain”.

Lan “fisikoa”

Hasieran, Urazurrutia 23 proiektuak narrazio bat osa zezan zen artistaren helburua; azkenean, ordea, “aurkezpen” gisara definitu du Renesek obra, erakusketaren aurkezpenean. Instalazioaren oinarri “fisikoa” ere nabarmendu du, eta lan “neketsua” izan dela azpimarratu. Banan-banan sortu du azuleju bakoitza. Egosi gabeko basa zatiak erosi, eta bukaerako emaitza lortu arteko bidea berak egin du, oso-osorik. Lana gorabehera, artista pozik agertu da BilboArten egindako egonaldiarekin: “Esperientzia ahaztezina izan da”.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Epaileak, Bizkaiko Bertsolari Txapelketa epaitzen. ©GORKA RUBIO / FOKU

Bertsogintzaren matematika

Miren Mujika Telleria

Hainbat faktorek egiten dute posible bertsolari txapelketa bat, eta faktore horien artean dago, noski, epailetza. Hogeita bat epaile arituko dira hasi berri den txapelketan bertso bakoitzari puntuazioa ematen. Zein da, baina, puntu horiek gora edo behera egiteko neurgailua?
Gozategi taldearen kontzertua, Donostiako Aste Nagusian. ©Gorka Rubio

30 urte, baina beti gazte

Maria Ortega Zubiate - Gipuzkoako Hitza

Gozategi taldea 30. urteurreneko biran ari da aurten, eta plazetako harrera «ikaragarria» izaten ari dela dio Asier Gozategi soinu jotzaileak. Bihar Urnietan joko dute, eta urriaren 15ean, Zarautzen.

 ©IRUNE IZQUIERDO

Erretzaile damutuen konpainia

Berria

Aingeru Epaltzak hirurogei urteen talaiara iristen ari den kazetari bat jarri du 'Erretzaile damutuen konpainia' eleberri berriaren ardatzean: Edu Saragueta. Komedia garratz eta erotikoa, gizarte nahasi baten erretratua eta, batez ere, nobela beltz petoa osatu du.

Piztu METAk hamabost proiektu hautatu ditu

Berria

Egitasmoak sustatzeko finantzaketa kolektiboa hasiko dute. Gipuzkoako aldundiak 70.000 euro jarriko ditu

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...