Ondarea

Arte Ederrak eraikinari buruzko txostenak ezkutatzea egotzi dio oposizioak Donostiako udal gobernuari

Eneko Goia alkateak eraikina eraisteko baimena emateko dagoen arriskuaz ohartarazi dute.

Donostiako Arte Ederrak eraikina, artxiboko irudi batean.
Donostiako Arte Ederrak eraikina, artxiboko irudi batean. Andoni Canellada/Foku

Erredakzioa -

2019ko irailak 24

EH Bilduko, PPko eta Elkarrekin Donostiako ordezkarien esanetan, eraikinaren egoerari buruzko txosten teknikoak eskatu dizkiote EAJk eta PSEek osatzen duten udal gobernuari, baina ez dizkiete eman, nahiz eta eskaerak arauzko prozedurei jarraituz egin dituzten. "Sintomatikoa" iruditzen zaie udal teknikariek egindako eta diru publikoz ordaindutako txostenak ezkutatzea. "Eneko Goiak Arte Ederrak eraikina eraisteko baimena emango duela pentsaraztera garamatza".

Azaldu dute aurtengo ekainean ere, SADE eraikina partzialki eraisteko baimena eskatu zuenean, espedienteak eskatu zituztela, eta zerbait txosten falta zirela ikusi zutela, tartean Pedro Ponce Leon arkitektoaren txostena. "Hirigintza Jasangarriko zinegotzi ordezkaria den Nekane Arzallusek kopiarik ez zuela emango esan zuen batzordean, txosten horiek aldatzeko aukera zegoela argudiatuta".

Hiru alderdien esanetan, "donostiar guztiek" izan behar dute informazio hori izateko aukera, eta instituzio gisa behar duen gardentasuna urratzen ari da udal gobernua. "Eneko Goiak eraikinaren etorkizunerako funtsezkoa den informazioa eta txostenak bulegoko kaxoi batean gordetzen dituenean, agian, horien emaitzak ez zaizkiola gustatzen aditzera ematen ari da".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna