Gaur hasi da piraguismoko Munduko Txapelketa La Seu d'Urgellen (Herrialde Katalanak), eta txapelketan lehian ari diren Euskal Herriko kirolariek uzta oparoa jaso dute lehenengo egunean. Euskal Herriko piraguistek C1 eta K1 mailetan lortu dituzte dominak, taldekako probetan.
K1 mailan, urrezko domina eskuratu dute Joan Crespo eta Samuel Hernanz euskal herritarrek. David Llorenterekin batera osatu dute taldea.
C1 mailan, Klara Olazabalek zilarrezko domina irabazi du, Nuria Vilarubia eta Ainhoa Lameirorekin batera.
Ander Elosegik ere bigarren postua lortu du Munduko Txapelketan, eta zilarra eskuratu du. Luis Fernandezekin eta Miquel Traverekin osatu du taldea.
Banakako probak, bihartik aurrera
Bihar hasiko da banakako lehia. Chourraut eta Elosegi ariko dira K1 eta C1 mailetako kanporaketetan, goiz osoan. Finalerdietarako sailkatuz gero, larunbatean lehiatuko lirateke, eta egun horretan jokatuko litzateke finala.
Etzi, K1 eta C1 mailetako kanporaketak jokatuko dituzte Crespok, Hernanzek eta Olazabalek: aurreneko biak K1ean, eta azkena C1ean. Aurrera eginez gero, igandean ariko liratekete finalerdietan eta balizko finalean.
