Futbola

Emakume futbolarien greba, azaroaren 16-17ko jardunalditik aurrera

Ez da akordiorik egon sindikatuen eta Kluben Elkartearen artean Madrilen egindako adiskidetze ekitaldian.

Ainara Arratibel Gascon -

2019ko urriak 28

Emakume futbolarien greba mugagabearen hasierak badu data: azaroaren 16-17ko jardunaldia. Madrilen egin dute sindikatuek eta Kluben Elkarteak ados jartzeko azken ahalegina, adiskidantza ekitaldian. Baina ez dute akordiorik lortu. Beraz, grebarako tramiteek aurrera segitzen dute, eta, epeak kontuan hartuta, asteburu hau izango da jokalariek jokatuko duten azken jardunaldia, akordioa lortu bitarte.

Hurrengoan etena dagoela kontuan hartuta, bi asteburu barru hasiko litzateke greba. Jokalariek ez dituzte partidak jokatuko, baina entrenatzen segituko dute. Aurreko asteartean iragarri zuten greba mugagabera jotzeko asmoa; legeak hala aginduta, adiskidantzazko ekitaldia behar zen. Hor ere ez da aurrerapausorik eman. Lanaldiaren iraupenean dago kluben elkartearen eta futbolarien arteko desadostasun nagusia. Horrek apurtu zituen elkarrizketak, eta egoera ez da bideratu. Izan ere, lanaldia gutxienez %75ekoa izatea eskatzen dute futbolariek;  kluben elkarteak —bertan dira klub guztiak Athletic, Bartzelona eta Tacon izan ezik—, berriz, jardun erdian jarri dute muga.

Jokalariek hasieran %100ekoa izatea eskatzen zuten, baina, akordiorako keinu gisa, %75era jaistea onartu zuten. Kluben Elkarteak, ordea, uste du ezinezkoa dela horra iristea. "Txapelketak sortzen dituen etekin ekonomikoak kontuan hartuta, muga %50ean jarri behar dugu". Jokalariak ez daude ados horrekin. Hala adierazi zuen Ainhoa Tirapu Athleticeko jokalariak: «Azken batean, gu egun osoan gara futbolari, eta gure bizimodua horren arabera egiten dugu. Beraz, horri dagozkion baldintzak eskatzen ditugu, besterik ez. Guretzat kontratuen partzialtasunarena oso puntu inportantea da. Izan ere, horri lotuta daude gure etorkizuneko hainbat kontu». Adibide argigarri bat jarri zuen. «Lesio larri bat izan eta denbora luzeko gaixoaldi bat badugu, kontratuetan jasotzen den lanaldiaren iraupenak eragin handia du».

Urtebete, nahi ezin

Hilabeteko atzerapenarekin, iazko azaroaren 8an jarri zen martxan Espainiako Ligako emakume futbolarien aurreneko lan hitzarmena negoziatzeko mahaia. Sindikatuek izan beharreko ordezkaritzari eta sinatu beharreko akordio motari buruzko desadostasunek eragin zuten atzerapena. Helburua zen hitzarmena ahalik eta azkarren adostea.

Baina hilabete hauetan egindako hemezortzi bileretan ez dute lortu hitzarmena adostea, nahiz eta hainbat puntutan aldeek bat egin; adibidez, lan hitzarmena adosteko orduan zegoen beste puntu garrantzitsuetako bat gutxieneko soldata zen. Azken bileretan, gutxieneko soldata gordina urtean 16.000 eurokoa izatea adostu zuten.

Lan hitzarmenean jaso nahi dituzten eskubideen artean daude, gainera, gaixoaldian soldata osoa kobratzea, horren arrazoia edozein izanda ere; 30 eguneko oporraldia izatea, horietatik 21 udan eta segidan; irudi eskubideen parte bat futbolarientzat izatea. Horrekin batera, bi protokolo ere jaso nahi dituzte: haurdunaldi kasuei lotutakoa bata, eta sexu jazarpenei lotutakoa bestea, hain zuzen ere.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna