Euskal Presoak

Zigor Garro eskumuturreko elektronikoarekin aske uztea onartu du Parisek

Fiskalak 24 orduan helegiterik jartzen ez badu, azaroaren 28an aterako da euskal presoa. Lehen aldia litzateke Hegoaldeko euskal preso batek baldintzapeko askatasuna lortzen duena Frantzian.

Zigor Garro oraindik preso zegoela bere ama zenari eginiko omenaldian, Urruñan, iazko otsailean. /
Zigor Garro oraindik preso zegoela bere ama zenari eginiko omenaldian, Urruñan, iazko otsailean. / Bob Edme

Ekhi Erremundegi Beloki -

2019ko azaroak 22

Zigorrak Ezartzeko Parisko Dei Auzitegiak onartu du Zigor Garro euskal presoak eskumuturreko elektronikoarekin bukatzea zigorra. Urriaren 23an egin zuten auzi saioa, eta, ohi ez bezala, prokuradorea ez zen agertu presoa askatzearen kontra. Hala ere, helegitea jar dezake 24 orduko epean; orduan, Garro ez litzateke aterako kartzelatik. Bestela ere, fiskalak hamar eguneko epea dauka helegitea aurkezteko, baina, kasu horretan, presoa kalera ateratzen ahalko da. Maritxu Paulus Basurko abokatuak esan du «fiskalak logikoki jokatzen badu» presoak kondena eskumuturrekoarekin bukatzen ahalko duela, kanpoan. Hala ere, ohartarazi du «kontuz» jokatu behar dela helegite epeak pasatu bitartean.

Azken hilabeteetan, behin baino gehiagotan eman diote presondegitik ateratzeko baimena Errenteriako (Gipuzkoa) presoari: iazko otsailean, amaren ehorzketan izan zen, Zokoan (Lapurdi), eta, geroztik, lanari lotutako hitzorduak izan ditu, aurtengo udan eta ikasturte hasieran. 2020ko udaberrian du kondenaren amaiera ofiziala. Mont-de-Marsanen (Okzitania) dago preso iazko otsailetik.

2006an atzeman zuten Garro, Quezac herrian (Lozere, Frantzia), ETArekin lotuta; 2014an, hamazazpi urteko presondegi zigorrera kondenatu zuten. Epaiketaren hasieran, «militante politikotzat» jo zuten beren burua, eta Frantziako Estatuaren eta Espainiakoaren jarrera kritikatzeaz batera, ETAren indarkeriak «biktima errugabeei» eragindako mina aitortu zuten.

Hegoaldeko euskal preso baten lehen kasua

Frantziako Kontseilu Konstituzionalaren ebazpen baten ondorioz —duela bi hilabete eta erdi jakin zen—, Frantziako Estatuko espetxeetan diren Hego Euskal Herriko presoak ere hasi dira baldintzapeko askatasuna eskatzen. Garrok ez ezik, Alaitz Areitiok ere eskatu zuen orain aste batzuk. Zigor Merodiok ere galdegin zuen, baina aske geratu zen gero, zigorra beteta. Garroz eta Areitioz gain, Hegoaldeko beste hamar preso bide bera jorratzeko moduan dira, bakoitza bere garaian, eta batzuk hasi dira horretan. Beste 21ek badute eragozpen bat: Madrilen estradizio edo euroagindu eskaerak direla eta, haiek Espainiaratzea onartzea.

Kontseilu Konstituzionalak Frantziako Konstituzioaren kontrakotzat jo zuen «terrorismo» aferetan zigortuak dauden «atzerriko nazionalitateko» kideek Parisi ezin eskatu ahal izatea baldintzapeko askatasuna —2016tik zigor prozedurako lege artikulu berri batek eskaera horiek egiteko baldintzak zorroztu zituen, eta Frantziako lurraldean egoteko debekua jasoa zuten atzerriko presoei eskaera egitea eragotzi zien—. Kontseilu Konstituzionalak ebatzi zuen proportzionaltasun printzipioa urratzen zela, eta gobernuari agindu zion legea erreformatu edo zuzendu dezala, beranduenez datorren urteko uztailaren 1erako.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Donostiari 1813an su eman ziotela oroitzeko Dora Salazarrek egindako eskultura, maskara jantzita ©JUAN CARLOS RUIZ / FOKU

COVID-19aren uste ustelak

Mikel P. Ansa

COVID-19aren pandemia ukatzen duten joera batzuek indarra hartu dute uda honetan. Haiek zabaldutako uste batzuk zeinen okerrak diren azaldu dute Miren Basaras eta Guillermo Quindos mikrobiologoek artikulu sorta honetan.

Ikasle batzuk, ikasgelan, ikasturteko lehen egunean egindako argazki batean. ©IDOIA ZABALETA / FOKU

Eskola orduak: eztabaida zaharberritua

Mikel O. Iribar

Ordutegi jarraituaren aldeko plataforma bat sortu dute: institutuetatik kanpo ere jartzea nahi dute. Nafarroan hala ari dira, baina Jaurlaritzak ez du onartu. EHIGEk uste du eztabaida pedagogikoa behar dela.

COVID-19a atzemateko test bat, Donostian. ©GORKA RUBIO / FOKU

Beste 612 positibo atzeman dituzte Hegoaldeko azken zenbaketetan

Uxue Rey Gorraiz

Hiru pertsona hil dira birusaren ondorioz Hego Euskal Herrian, Nafarroan hirurak. 510 lagun daude ospitaleratuta; horietatik 84, ZIUetan

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna