Euriteak
Bost pertsona hil dira Okzitaniako uholdeetan
Hildakoetako hiru erreskate taldeetako kideak dira; helikopteroan amildu dira
Marseillatik (Okzitania) gertu aurkitu dituzte hilda erreskate zibileko helikoptero bateko eskifaiako hiru kide gaur gauean, Frantziako Barne Arazoetako Ministerioak zabaldu duenez.
Lo Canet dei Mauras herrian dagoen aireportura zihoan helikopteroa, eskualdean gauean gertaturiko uholdeen kalteak ikusteko eta salbamendu lanetan aritzeko. Komunikazioak eten direnean, helikopteroaren bila hasi dira. Goizaldeko 01:30ean topatu dituzte hondakinak eta hildako hiru langileen gorpuzkiak, Lo Rove herriko lurretan.
Igande gauean gogotik egin du euria. Bi pertsona hil dira Var departamenduan. Frejusen, zalditegi baten jabea eraman du urak, eta Saint-Paul-en-Foreten, abeltzain bat atera da abereak etxeratzeko, baina uholdeak harrapatu du autoarekin ibi bat zeharkatzen saiatu denean.
