Ekonomia

ELAk salatu du beste sindikatuak Bizkaiko metalgintzako patronalarekin bildu zirela

«Atsekabea» onartu du sindikatuak FVEMek plataforma bateratuaren eskakizunak murriztea lortu duelako.

Bizkaiko metalgintzako langileen manifestazioa greba egun batean.
Bizkaiko metalgintzako langileen manifestazioa greba egun batean. Monika del Valle / FOKU

Imanol Magro Eizmendi -

2019ko abenduak 3

ELAren ustez, «aukera historiko» bat alferrik galdu da Bizkaiko metalgintzan lan akordio hobe bat lortzeko, eta ez da baliatu «patronala ahulezia aldi betean» egon izana. Sindikatuak salatu duenez, lan hitzarmena sinatu duten sindikatuek —CCOOk, LABek eta UGTk— bilerak izan zituzten FVEM Bizkaiko metalgintzako patronalarekin Lan Harremanen Kontseilutik kanpo, eta hortik etorri dela «batasun sindikalaren haustura». ELAren arabera, bilera horien ondorioz, sindikatuak euren eskakizunak murriztuz joan ziren FVEMekin akordioa lortu arte.

 

Sindikatuak onartu du, halaber, lan hitzarmenean aurrerapausoak eman direla, baina iritzi dio akordioa ez dela «nahikoa». Alde horretatik, gutxien gustatu zaizkien puntuak deskribatu dituzte. Besteak beste, uste dute hobekuntza egon dela subrogazioan, baina azpikontratetako lankide asko, «prekarioenak», lan bizitzari egonkortasuna emango liokeen eskubide gabe utzi ditu. Era berean, ABLEn erabilera eta kontratazioetarako mugarik ez egotea salatu dute.

 

ELAk borrokari eusteko asmoa plazaratu du, baina enpresaz enpresa. Sektoreko dinamika amaitutzat eman du, eta orain «hitzarmen propio» hobeak lortzen saiatuko da. Enpresak deitu ditu lan baldintza hobeen alde egitera.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna