Durangoko Azoka

Ikasleak protagonista direla hasi da Durangoko Azokaren 54. aldia

Ikasleen goiza da gaurkoa, eta gazte ugari bildu dira azokara. Ekintza ugari antolatu dituzte; besteak beste, Trakamatraka tailerra: musika eta sormena uztartzen ditu.

Nagore Arin.
2019ko abenduaren 5a
22:59
Entzun

Indartsu hasi da Durangoko Azokaren 54. aldia. Ateak ireki bezain laster sartu dira bisitariak azokara. Ikasleen goiza da gaurkoa, eta ikasleei bideratuta daude gaurko jarduera gehienak. Hala ere, adin guztietako jendea bildu da, eta azokaren korridore eta postuetan barrena ari dira aurtengo eskaintza andana ikusten.

Ohi bezala, jende ugari pilatu da azokako hainbat salmahaitan; nabarmentzekoak, bi: En Tol Sarmiento eta Zetak musika taldeenak. Ikasle gaztez bete da postu horien ingurua, musikariekin argazki bat ateratzeko eta taldeak kaleratu berri duten diskoa sinatzeko. Toti Martinez de Lezea idazlearen erakusmahaiaren inguruan ere bisitari andana bildu da.

Azokaren gunetik kanpo, tailer parte hartzaile eta ekintza ugari antolatu dituzte. Horietako bat da Trakamatraka tailerra. Ahotsenea zuzenekoen gunea ikaslez bete da Jon Urrutiaren hitzaldia entzuteko eta ikusteko. Musika sormenari buruzkoa da tailerra, eta objektu bat oinarri hartuta musika sortu litekeela erakutsi die Urrutiak gerturatu diren gazteei. Azenario batekin eta inbutu batekin osatutako tronpeta bat egin du lehenengo; makulu bat desmuntatu, eta txirula moduko bat egin du ondoren.

«Musika aniztasuna, sormena eta irudimena, birziklatzea eta ingurumenarekiko errespetua» landu dituzte tailerrean, sormena jolaserako tresna bat dela nabarmenduta. Urrutiaren arabera: «Ideia eta kontzeptu ezagunen arteko elkarketa berriak egitea eta ideia eta kontzeptu berriak sortzea da sormena». Eguerdian eta arratsaldean ere jarduera ugari egongo dira azokaren zazpi guneetan. Igandera bitartean egongo da zabalik, eta aurtengo aldian 200 kultur ekitaldi baino gehiago eta 264 erakusmahai egongo dira, 405 nobedaderekin: 273 liburu, 91 disko, 16 aldizkari...

Ahotsenean ez ezik, azokako beste plazak eta guneak ere martxan jarri dituzte gaur, eta Irudienean izan da zer ikusia, adibidez.

Ekinaldi eta egitasmo berriak aurkezteko plaza ere bada Durangoko Azoka. Ostegun honetan, adibidez, 2020ko udan egingo duten EuskarAbenturako ekitaldia aurkeztu dute.

BERRIA ere Landakon dago, urtero ohi duen legez. Artekaleko 36-37 zenbakietan dauka postua aurten.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.