Katalunia

Kataluniako Auzitegi Nagusiak urte eta erdiko inhabilitazioa ezarri dio Torrari

Desobedientzia delitua egotzi diote, eta 30.000 euroko isuna ere jarri diote, xingola horia garaiz ez kendu izanagatik.

Quim Torra Generalitateko presidentea, joan den asteko argazki batean.
Quim Torra Generalitateko presidentea, joan den asteko argazki batean. Toni Albir / EFE

Andoni Imaz -

2019ko abenduak 19

Kataluniako Auzitegi Nagusiak zigorra ezarri dio Quim Torra Generalitateko presidenteari. Hark uko egin zion Espainiako Hauteskunde Batzordearen agindua betetzeari, eta ez zituen garaiz kendu espetxean dauden buruzagi independentisten aldeko xingola horiak eraikin publikoetatik Espainiako Gorteetarako hauteskundeen kanpainan. Auzitegiak sententzia eman du: urte eta erdiko inhabilitazioa, eta 30.000 euroko isuna.

Orduan, xingola horiak kendu ez, eta zuriekin eta presoen aldeko mezuekin ordezkatu zituen. Azkenean, horiek ere kendu zituen, Kataluniako arartekoaren aholkuari jarraituz. Torrak argi utzi zuen ez ziola jaramonik egin Hauteskunde Batzordeari: «Ez, ez nuen bete. Ezinezkoa zen legez kanpoko agindu bat betetzea. Erakunde horrek ez zuen eskumenik horretarako». Orain, Kataluniako Auzitegi Nagusiak ebatzi du «jarrera desobediente setatia eta errepikatua» izan zuela aginduari uko egin zionean.

Inhabilitazio zigorra ez da berehala sartuko indarrean, Torrak oraindik helegitea jar dezakeelako Espainiako Auzitegi Gorenean. Alegia, gaurko sententziak ez du esan nahi Torra berehala kenduko dutenik Generalitateko presidente kargutik.

Torraren aurkako zigorra Oriol Junquerasen immunitate aitortzaren ondoren iritsi da: Europako Justizia Auzitegiak goizean ebatzi du Junqueras eurodiputatu aukeratu zutenean indargabetu behar zituztela haren aurkako behin-behineko zigorrak. Kataluniako Auzitegi Nagusiaren sententzia Palaura eraman dute, eta handik parlamentura, Torra zegoen lekura.

Hauteskunde Batzordeak gertatutakoa ikertzeko eskatu zion Espainiako Fiskaltza Nagusiari, eta Kataluniako Fiskaltzak Torraren aurkako salaketa aurkeztu zuen. Hauteskunde Batzordearen aginduari «kontzienteki» muzin egitea leporatu zioten. Fiskaltzak eskatu zuen presidenteari kargu publikoetan aritzea debekatzeko urtebete eta zortzi hilabetez, «desobedientziagatik», eta 30.000 euroko isuna ezartzeko; epaileak ia bere horretan onartu du eskaria.

Torrari azaroaren 18an egin zioten ahozko epaiketa, eta orduan ere argi esan zuen uko egin ziola «preso politikoak eta erbesteratuak aske» uzteko eskatzen zuen pankarta kentzeko aginduari. Gainera, esan zuen epaiketa politikoa zela hura, eta adierazpen askatasuna aldarrikatu zuen.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

PCR proba bat, Gurutzetako ospitalean. ©Luis Jauregialtzo, FOKU

Positibo kopuruak goia jo du Nafarroan

Uxue Rey Gorraiz

Beste 749 kasu atzeman dituzte Hegoaldean, eta nabarmen ugaritu dira Nafarroan: 362 kutsatu detektatu dituzte azken egunean. 501 lagun daude erietxeratuta Hego Euskal Herrian, eta 82 gaixo daude ZIUetan.

Zestoa, artxiboko irudi batean. ©Gorka Rubio / Foku

Eraikin publikoak eta tabernak itxi dituzte Zestoan

Berria

28 kasu baieztatu dituzte azken egunetan, eta neurri murriztaileak hartu dituzte agerraldiari aurre egiteko asmoz. Datozen egunetan egoera «kontrolatzea» espero dute.

Iñigo Urkullu omenaldian ©Eusko Jaurlaritza

Koronabirusaren biktimak omendu dituzte Gasteizen

Uxue Rey Gorraiz

Iñigo Urkullu lehendakariak gidatu du ekitaldia. Pandemiarengatik hildakoak gogoratu ditu, eta elkartasuna adierazi die familiei. «Elkarrizketa soziala» bultzatu dadin galdegin du, bizikidetza sozialaren berreraikuntzarako.

Sindikatuen eta Sareren elkarretaratzea, presoen egoeraren harira Bilbon. ©Marisol Ramires/FOKU

Hainbat espetxetan komunikazioak eten dituztela salatu dute Sarek eta Etxerat-ek

Maria Ortega Zubiate

Presoek eta haien senideek “garai oso zailak” bizi dituztela adierazi dute bi elkarteek, eta pandemiak “salbuespenezko erregimenaren aplikazioa” areagotzen duela. Positibotzat jo dituzte Eusko Legebiltzarrean eta Espainian espetxe politika aldatzeko egindako adierazpenak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna