Albistea entzun

Ingurumena

Hegoaldeko hiriburuetako airearen kutsadura %46 apaldu da martxoko bigarren hamabostaldian

Nitrogeno dioxidoak eragindako kutsadura atmosferikoaren maila neurtu du Ekologistak Martxan taldeak. Hiri mugikortasuneko politikak aldatzeko eskatu dute: «asmo handiko emisio txikiko eremuak» proposatu dituzte.

Errepideak hutsik, Arratzu-Ubarrundia, joan den asteko argazki batean.
Errepideak hutsik, Arratzu-Ubarrundia, joan den asteko argazki batean. Jaizki Fontaneda / Foku Tamaina handiagoan ikusi

Andoni Imaz -

2020ko apirilak 2 14:35

Koronabirusari aurre egiteko ezarritako neurriek berehalako eragina izan dute airearen kalitatean. «Hobekuntza orokorra izaten ari da, hirietako erdiguneetan zein kanpoaldean, zirkulazioa mugatzeko neurriak ere orokorrak izan baitira», Ekologistak Martxan taldearen arabera. Nitrogeno dioxidoaren (NO2) datu ofizialak aztertu dituzte txosten batean: 2020ko martxoko datuak aurreko hamar urteetan hartutakoekin konparatu dituzte, eta aldea «nabarmena» da, haien esanetan. Hego Euskal Herrian, hilabetearen bigarren zatian mugatu zuten mugikortasuna, 14tik aurrera; beraz, azterketa horrek martxoko airearen kalitatearen «irudi finko bat» erakusten du, konfinamendu neurriak ezarri aurreko eta ondorengo datuak baitaude.

Bilbon, Donostian, Gasteizen eta Iruñean, alarma egoeran erregistratutako NO2aren maila azken hamarkadan martxoko bigarren hamabostaldian jasotako baxuena da. Gainera, ekologistek adierazi dute Osasunaren Mundu Erakundearen urteko gidaren «oso azpitik» daudela, gainontzeko urteetan ez bezala.

Kutsaduraren murrizketa %46 izan da batez beste: Bilbon, %40; Donostian, %41; Gasteizen, %54; eta Iruñean, %49. Aldea handiagoa da trafiko handiko lekuetan hiri ondokoetan baino. Bilbon eta Donostian kutsadura gutxiago murriztu da, «beharbada faktore meteorologikoengatik». Bestela ere, euriek eta martxoko ezegonkortasun atmosferikoak ere asko lagundu dute airearen kalitatea hobetzen.

Talde ekologistak ondorio argia atera du: hirietako motor trafikoa murrizteak nabarmen gutxitzen duela kutsadura eta, beraz, osasun publikoa hobetzen duela. Hori guztia osasun larrialdiko egoera batean gertatzea paradoxikoa den arren, instituzioei adierazi diete badela nahikoa arrazoi mugikortasun politikak aldatzeko: «Emisio txikiko eremuak ezarri beharko lirateke, garraio publikoa berreskuratu eta bizikleta eta oinezkoen zirkulazioa indartu, ibilgailu motordun pribatuaren ordezko garraiobide gisa», eskatu dute.

Nitrogeno dioxidoa autoen ihes hodiek isurtzen duten kutsatzailerik ohikoena da; hortaz, haren bilakaera erabat lotuta dago motor trafikoaren isurketekin. «Gas narritagarria da, eta arnasketako gaixotasunak larriagotzen ditu, baita hainbat heriotza goiztiar eragin ere», azaldu du Ekologistak Martxan-ek.

Bilbon, Europa parkean, Arraizen, Mazarredon eta Maria Diaz de Haron egin dituzte neurketak. Donostiako erregistro puntuak Añorgan, Eason, Puion, Tolosa hiribidean eta Ategorrietan daude. Gasteizen, Herrandarren kalean, Martxoaren Hiruaren plazan eta Gasteiz hiribidean neurtu dute airearen kalitatea. Iruñean, Iturraman, Arrotxapean eta Gurutzeko plazan.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Euskarazko irakaskuntzaren aldeko protes bat, 2021ean ©Guillaume Fauveau

NBEk azalpenak eskatu dizkio Frantziako Gobernuari hizkuntza gutxituei buruz

Ekhi Erremundegi Beloki

NBE beldur da Frantziako Konstituzio Kontseiluak 'Molac legearen' kontra hartutako erabakiak Frantziako gutxiengo linguistikoen giza eskubideei kalte garrantzitsuak eragiten ahal dizkiela

Etxean Zaindu eta Zaintel aurkeztu dituzte ©Jaizki Fontaneda / Foku

Eusko Jaurlaritzak familia zaintzaileak laguntzeko bi zerbitzu aurkeztu ditu

Isabel Jaurena

Mendeko pertsonak zaintzen dituztenen eguneroko bizitza erraztea da helburua

Errigoraren agerraldia joan den larunbatean. ©/ Errigora

Errigorak diru bilketa antolatu du Nafarroako suteengatik

Isabel Jaurena

Etorkizunean halakorik berriz ez gertatzeko erabiliko dira irabazi guztiak.

Miarritzeko ordainlekua, artxiboko irudian. ©Nicolas Mollo

Gizon bat hil da Miarritzen izandako auto istripu batean

Berria

Miarritzeko ordainlekuan gertatu zen istripua, atzo. Bi emazte Baionako ospitalera eraman behar izan dituzte, larri. Bi haur arinki zauritu dira, eta Baionako ospitalera eraman dituzte horiek ere.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...