Noiz sortua: 2020-04-09 16:40:03

EAJk atea ireki dio Sanchezek proposatutako itunean parte hartzeari; EH Bildu ez da joango

Apirilaren 26ra arte luzatu dute alarma egoera, eta Sanchezek aurreratu du uste duela hamabost egun barru berriro alarma dekretua luzatu beharko duela

350 diputatutik 43 joan dira Espainiako Kogresura
350 diputatutik 43 joan dira Espainiako Kogresura mariscal / EFE Tamaina handiagoan ikusi

Irati Urdalleta Lete -

2020ko apirilak 9

Espainiako presidente Pedro Sanchezek alarma egoera luzatzeari buruzko azalpenak eman ditu kongresuan. Onartu dute apirilaren 26ra arte alarma egoera luzatzea, eta ohartarazi du uste duela hamabost egun barru berriro alarma dekretua luzatu beharko duela.

Hala ere, datorren asterako jarri du lehen zita Sanchezek. Moncloako Itun berria egiteko bilera batera deitu ditu alderdi politikoak, sindikatuak, patronala, autonomia erkidegoetako lehendakariak eta beste sektore batzuetako ordezkariak. Horrela, COVID-19ak eragindako osasun krisiaren ondoren, Espainia «berreraiki» nahi du. Euskal alderdi nagusiek erantzun diote proposamenari: EAJk atea ireki dio parte hartzeari; EH Bildu, berriz, ez da joango.

Sanchezek asmoaren berri eman duenean, Aitor Esteban EAJren Espainiako Kongresuko bozeramaileak esan du bere alderdiak «arduraz» jokatuko duela, eta prest daudela joateko «herritarren interesak jokoan» dauden lekuetara. Hala ere, ohartarazi du edozein akordiok kontuan hartu beharko dituela autonomia erkidegoak, eta itunari «Moncloakoa» deitzea arbuiatu du. EH Bilduren kongresuko diputatu Oskar Matutek azaldu du ez direla egongo 1977an lortutakoen «berrargitalpena» diren itunean. Matuteren iritziz, bilatu nahi duten bakarra da «ezkutatzea jendea itotzen duten eta haien eskubideak murrizten dituzten zentralizazio gehiago eta eskuinaren politika neoliberalak aplikatu izana».

Aitor Estebanek esan du alarma egoera luzatzearen alde egingo duela EAJk, momentu honetan «garrantzitsuena» pandemia amaitzea dela, eta horretarako beharrezkoa dela zirkulazio eskubidea murriztea. «Hori alarma egoeran egonda soilik egin daiteke», zehaztu du. EH Bilduk, berriz, abstenitzea erabaki du. Matute ezinbestekoak ez diren jarduerak geratzeko beharraz aritu da, eta proposatutako neurriak ez direla nahikoa esan du, «jende asko kutsatzeko arriskuan jartzen delako». Zehaztu du jarduera horiek geratuta egon behar dutela, osasun bermeak ez dauden bitartean, eta gaineratu du pandemia geratzea lortzen denean soilik berreraiki daitekeela ekonomia. «Lehenengo bizi, eta gero, lan egin». Sanchezek esan duenez, berriz, orain kutsaketak etxe barruan gertatzen dira, eta ez handik kanpo.

Espainiako Gobernuak koronabirusaren krisiaren inguruan egin duen kudeaketaz ere aritu dira. Kolaborazioa eta kooperazioa «ezinbestekoak» direla esan du Estebanek. Autonomia erkidegoen beharra azpimarratu du, eta neurriak hartu aurretik elkarrizketa gehiago eskatu. «Ezin da esan gauza bat eta kontrakoa, eta kontsultatu gabeko eta ustekabeko erabakiak hartu egun batetik bestera», erantsi du. Ildo beretik, «erabaki errealistak» eskatu ditu, eta ez «nahasketa» eragiten dutenak, baizik eta «lasaitasuna» dakartzatenak. Horri lotuta, Pedro Sanchezek elkarrizketarako prest daudela ziurtatu du: «Egungo egoeran, behartuta gaude erabakiak hartzera, ez orduetan, minutuetan baizik, baina horrek ez du esan nahi ez daukagula elkarrizketarako bokaziorik». Gainera, haren hitzetan, autonomia erkidegoek osasun arloan dituzten eskumenei eutsi diete, eta ez da «birzentralizaziorik» egon. Erantsi du autonomia erkidegoengan «konfiantza» duela, eta krisitik ateratako ikasketa bat dela «estatu autonomikoa indartzeko beharra».

Sanchezek koronabirusari aurre egiteko egin duten lana azpimarratu du: «Europa guztia berandu iritsi zen, baina Espainia lehenago aritu zen». Hala ere, autokritikarako tartea ere hartu du: «Gaur daukagun ezagutzarekin, atzo egindako gauza batzuk desberdin egingo genituzte». Eta honakoa erantsi du: «Gobernu hau autoexigentea, autokritikoa eta umila da».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Maiatzaren 26an eguneratua, 20:00etan. ©BERRIA

Koronabirusaren azken datuak

Berria

Azkeneko 24 orduetan zazpi pertsona hil dira COVID-19 gaitzaren eraginez, 11 positibo atzeman dituzte PCR probekin, eta lau gaixo ospitaleratu dituzte. Euskal Herrian 28.634 gaixok eman dute positibo guztira, koronabirusa atzemateko probaren bat eginda. Horietatik 2.027 hil dira. Grafikoak, albiste barruan.

Berra adinekoen egoitza. ©JON URBE / FOKU

Ekainaren 8tik egin ahalko dira bisitak Gipuzkoako zahar etxeetan

Berria

Egoiliar bakoitzeko senide bakarra joan ahal izango da bisitan, eta segurtasun neurriak zorroztuko dituzte. Gipuzkoako zahar etxeetan 167 pertsona hil dira izurria hasi zenetik; gaur egun 22 eri daude, bi egoitzatan.

Maiatzaren 11an igaro zen lehen fasera Hegoaldea ©Marisol Ramirez, Foku

Hegoaldea lehen fasera igaro izanaren arrazoiak eman ditu Espainiako Gobernuak

Ainhoa Larretxea Agirre

Espainiako Osasun Ministerioak zehaztu du egoera epidemiologiko «ona» izan dela Nafarroa pasatzeko arrazoia; Osakidetzak pazienteak artatzeko duen «gaitasun handia», berriz, Araba, Bizkaia eta Gipuzkoa igarotzekoa. Maiatzaren 11n aldatu zen lehen fasera Hegoaldea.

Txagorritxu ospitaleko laborategiko irudi bat. ©Gorka Rubio / Foku

Datuen peskizan (eguneko laburpena)

Pello Urzelai

Beste zazpi pertsona gehitu behar dira koronabirusarekin hildakoen zerrendara. Bost EAEn, bi Nafarroan. PCR bidezko 11 positibo berri agertu dira.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna