Sindikatuek salatu dute Hezkuntza Sailak «entzungor» egin diola euren proposamenari

ELAk, LABek, Steilasek, CCOOk eta UGTk ohartarazi dute ikastetxeren batean segurtasun bermerik ez badago «beharrezko mobilizazioak eta ekimenak» abian jarriko dituztela, grebara jotzeko aukera barne.

Ikastetxe bateko gela bat hutsik
Ikastetxe bateko gela bat hutsik Jon Urbe / Foku Tamaina handiagoan ikusi

Irati Urdalleta Lete -

2020ko maiatzak 22

Astelehenean dira itzultzekoak ikasgelara Arabako, Bizkaiko eta Gipuzkoako hainbat ikasle. ELA, LAB, Steilas, CCOO eta UGT sindikatuek «inprobisazioa, arduragabekeria eta etengabeko irizpide aldaketak» izan direla salatu dute. Horren aurka, esan dute aste honetan Eusko Jaurlaritzako Hezkuntza Sailari proposamen «zehatz» bat helarazi diotela ikastetxeetarako itzulera «segurua, adostua eta kalitatezkoa» izan dadin. «Proposamenean, Hezkuntza Sailari galdegiten genion langileon ordezkariokin negoziatzeko eta adosteko ikasturte amaierarako plangintza; aurrez aurreko ikasketetara zein lanera itzultzeko baldintzak; eta segurtasun eta osasun neurriak eta protokoloak». Horrez gain, negoziazio prozesu hori abiatzen ez den bitartean «aldebakarrez» hartutako erabakiak bertan behera uzteko eskatu diote.

Sindikatuen hitzetan, Hezkuntza Sailak euren proposamenari dagokionez egin duen gauza bakarra dokumentu bat bidaltzea izan da, zeinak ez baitie erantzun ere egiten proposamenean ikasturte amaieraren plangintzarako planteatzen direnei. «Aldebakarreko plangintza abian jarri baino bi egun lehenago, gainera», zehaztu dute. Horrenbestez, iruditzen zaie argi dagoela helburua ez dela «negoziazio eta elkarrizketa erreal bat» bilatzea, ezta langileen ordezkarien proposamenak aintzat hartzea ere. «Hezkuntza Sailak langileen ordezkariak parte hartze eta negoziazio esparruetatik kanpo utzi nahi gaituela berresten da; izan ere, dokumentuan esaten denez, sindikatuok ordezkaritzarik izango ez dugun jarraipen batzorde bat sortu du», nabarmendu dute.

Eurek daukaten informazioaren arabera, astelehenean aurrez aurreko ikasketak oso ikastetxe gutxik jarriko dituzte abian, eta abian jarriko dituztenek ikastalde oso mugatuak hartuko dituzte, nagusiki errefortzu bat eskatzen duten ikasleak eta Batxilergoko bigarren mailako ikasleak, USE azterketaren prestaketari begira. Hala ere, ohartarazi dute Hezkuntza Sailak denbora eta aurreikuspen nahikoz ikastetxe bakoitzarekin ikasgeletara modu seguruan itzultzeko «prozesurik, baliabiderik eta jarraibide egokirik» jorratu ez izanak eragina izan dezakeela itzultzeko baldintzetan. «Litekeena da ikastetxe bakan batzuetan osasuna bermatuz ikasketari ekiteko baldintzarik ez egotea edo osasun irizpideak lehenesten ez dituzten baldintzetan planteatzea itzulera».

Hori eragozteko, sindikatuek ikastetxez ikastetxe aztertuko dute egoera, eta, ikastetxeren batean osasun neurriak bermatzen ez badira, «euren esku dauden tresna guztiak» abian jarriko dituzte, ikastetxe horretako langileek lanera ez joateko aukera izan dezaten, «langileen eta ikasleen osasuna bermatzeko». Iragarri dute sindikatuen arteko jarraipen batzorde propio bat sortuko dutela eta langileen eta ordezkarien esku jarriko dutela osasun neurrien inguruko galdetegi bat. «Osasun neurriak betetzen ez badira edo osasun irizpideak lehenesten ez dituzten baldintzak identifikatuz gero, sindikatuokin harremanetan jarri eta osasuna bermatua ez dagoen ikastetxe horietan osasuna bermatu arte beharrezko mobilizazio eta ekimenak abian jarriko ditugu, greba aukera barne».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Sindikatuen agerraldia, gaur. ©BERRIA

Hezkuntza Sailak «planifikazio integralik» ez duela salatu dute sindikatuek

Gotzon Hermosilla

Ohartarazi dute «transmisio kasuak ugarituko» direla neurriak hartzen ez badira. Greba egunetik astebetera, adierazi dute ez dutela baztertzen beste mobilizaziorik egitea.

Osasungintzako sindikatuen protestak. ©Gorka Rubio/FOKU

«Hitzetatik ekintzetara pasatzeko» eskatu diote sindikatuek Osakidetzari

Maria Ortega Zubiate

SATSE, ELA, LAB, SME, CCOO, UGT eta ESK sindikatuek osasun sistemaren egoera hobetzeko neurriak hartu ditzala eskatu diete Osakidetzari. Adierazi dute neurriak hartu ezean mobilizazioekin jarraituko dutela.

Hainbat ikasle, ikasgeletara sartzeko zain, Bilbon. ©Luis Jauregialtzo / Foku

32 ikasgela itxi dituzte egun bakarrean Hego Euskal Herrian

Mikel O. Iribar

Ikasturtea hasi zenetik, 364 ikasgela daude itxita Hegoaldean. Guztira 231 ikastetxetan izan dira itxiera horiek.

PCR proba bat, Gurutzetako ospitalean. ©Luis Jauregialtzo, FOKU

Lehen aldiz, laurehun kasuren langa gainditu du Nafarroak

Uxue Rey Gorraiz

Beste 826 kasu atzeman dituzte Hego Euskal Herrian. Horietatik 421 Nafarroan detektatu dituzte. Positiboek goia jo dute lurralde horretan, eta hildako bat izan da. 497 lagun daude erietxean Hegoaldean: horietatik 81, ZIUetan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna