Noiz sortua: 2020-05-22 20:49:24

Ikerketa

Txinan garatzen ari diren txerto baten lehen emaitza onak iragarri dituzte

Lehen aldiz, boluntario talde handi batekin aztertu dute COVID-19 gaitzaren kontrako txerto bat, eta segurua dela eta immunitatea sortzen duela ondorioztatu dute.

CanSino Biologics enpresaren laborategia, Tianjinen (Txina).
CanSino Biologics enpresaren laborategia, Tianjinen (Txina). CanSino Biologics Tamaina handiagoan ikusi

Edu Lartzanguren -

2020ko maiatzak 22

Txinatik zabaldu zen gaitza, eta baliteke Txinatik etortzea sendabidea. Pekingo Bioteknologia Institutuko eta CanSino Biologics konpainiako ikertzaileek txerto bat garatu dute, eta haiek egin dute lehenbiziko proba. The Lancet aldizkarian argitaratu dute ikerketa. 18 eta 60 urte arteko 108 boluntario osasuntsuri jarri diete txertoa. Hiru taldetan banatu dituzte: lehenengo taldeko boluntarioei txertoa izateko hautagaiaren dosi txikia eman diete, bigarrenekoei ertaina eta hirugarrenekoei handia. Injekzioan dagoen birus partikula kopurua da dosien arteko aldea. Giharrean sartu diete gaia.

Txertatu eta zazpi egunera, hainbat erreakzio txar sumatu dituzte proban parte hartu dutenen boluntario gehienetan, batez ere, giharretako mina, nekea, sukarra eta buruko mina. Edonola ere, sintoma horiek arinak izan dira. Ez dute erreakzio txar larririk atzeman txertatu eta 28 egunera. Baina boluntarioen odoletan antigorputzik sortu ote diren aztertu dute, eta baita atzeman ere 14 egunetik aurrera.

Ikertzaileek ondorioztatu dutenez, «txertoa jasangarria da, eta immunitatea sortzen du txertatu eta 28 egunera, heldu osasuntsuetan, eta T zelulen erantzun azkarrak atzeman dira 14. egunetik aurrera». T zelulak edo T linfozitoak infekzioen aurkako erantzunaren eragileak dira. Hezur muinetan sortzen dira, eta funtsezkoak dira immunitatean.

Dena den, probak ez du esan nahi txertoa laster plazaratzeko moduan egongo denik. Ikertzaileek ere adierazi duten¨ ikerketa gehiago» behar duela. Edonola ere, orain arte eginiko probarik serioena da.

Izan ere, astelehenean bertan eman zuten ezagutzera orain arte probaturiko lehen txertoa, AEBetako Moderna konpainiak eginikoa, baina bakarrik 45 boluntario erabili dituzte proban. Ondorioztatu dutenez, lehenengo zortzi saioetan, gaitza gainditu duten pertsonen adina antigorputzak sortu zituen txertoak, enpresak esan zuenez.

AEBetako agintariek baimena eman diete bigarren fasera pasatzeko, eta txertoa 600 boluntariorekin probatzeko. Uztailean, milaka pertsonekin probatu nahi dute.

Dena ondo bidean, txertoa urte amaierarako egongo litzateke kalean AEBetan, eta 2021. urtearen hasieran Europan. EBko hainbat enpresa ere ari dira txertoak garatzen.

Azkenean, txertoa noiz eta nondik helduko den ikusgai dago, baina aste honetan plazaraturiko probek erakusten dute munduko laborategiak azeleragailua sakatuta dutela.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Ekainaren 1ean eguneratua, 19:00etan. ©BERRIA

Koronabirusaren azken datuak

Berria

Azkeneko 24 orduetan ez da inor hil COVID-19 gaitzaren eraginez. Bost positibo atzeman dituzte PCR probekin, eta 11 gaixo ospitaleratu dituzte. Euskal Herrian 29.309 gaixok eman dute positibo guztira, koronabirusa atzemateko probaren bat eginda. Horietatik 2.066 hil dira. Grafikoak, albiste barruan.

Guardia bat pertsona bezero bati tenperatura hartzen, saltoki baten sarreran, Panama Hirian. ©Bienvenido Velasco / EFE

Munduan sei milioi pertsona baino gehiago kutsatu ditu birusak

Berria

375.000 pertsona hil dira COVID-19aren eraginez. Horien artean 105.000, Ameriketako Estatu Batuetan.

Gasteizko Andre Maria Zuriaren plazako tabernetako terrazak, jendez beteta. ©JAIZKI FONTANEDA / FOKU

Hegoaldea, hirugarren fasearen peskizan

Edurne Begiristain

Datozen egunetan ere datuak onak badira, astelehenean hirugarren fasera pasatuko da Hego Euskal Herria. Erkidegoek kudeatuko dute nolakoa izango den alarma egoeratik ateratzeko azken urratsa

Lanbideren bulego bat itxita, maiatzaren hasieran, Bilbon. ©Luis Jauregialtzo / Foku

Ia 3.800 langabe gehiago maiatzean, Hego Euskal Herrian

Edu Lartzanguren

Denera, 182.852 pertsona daude izena emanda lana topatzeko zerbitzuetan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna