Noiz sortua: 2020-05-28 16:10:40

Getxoko auto zinema bete egin da konfinamendu ondorengo lehen emanaldian

Iruñean eta Bizkaiko herri horretan abiatu dute filmak autoaren segurtasunetik ikusteko aukera.

Getxoko autozinema zabaldu zuten atzo berriz.
Getxoko autozinema zabaldu zuten atzo berriz. Luis Jauregialtzo / Foku Tamaina handiagoan ikusi

Edu Lartzanguren -

2020ko maiatzak 28

Berrogei auto, lerro-lerro, belardian, eta itsasoko istorio bat pantaila handian. Steven Spielbergek 1975. urtean estreinaturiko Jaws filmarekin (Tiburón, Les Dents de la mer), berriz ekin die emanaldiei Getxoko (Bizkaia) auto zinemak, COVID-19 gaitzak eragindako konfinamendua hasi zenetik eginiko lehen saioan. Filmak filmetan bezala ikusteko modu bat da.

Getxoko auto zinemak, berez, 130 autorentzako lekua dauka, eta konfinamendutik ateratzeko bigarren faseak baimena ematen zien herenak betetzeko. Edonola ere, antolatzaileek nahiago izan dute bakarrik 40 autorentzako lekua utzi, poliki hasteko.

Sarrerak Internet bidez erostea aholkatu zieten ikusleei, ahalik eta aurrez aurreko harreman gutxien egon zedin, eta hala egin dute gehienek. Horren bidez, autotik atera beharrik gabe sartu dira belardi zinemara, eta antolatzaileek euren txokora gidatu dituzte. Enpresaren arduradunek nabarmendu dutenez, auto zinema ohiko zinema aretoak baino seguruagoa da, ikusleak autoan sartuta geratzen direlako, eta, esan dutenez, inork ez duelako eseri behar aurretik beste norbaitek erabilitako eserleku batean. Horregatik, asko «harritu» zituen konfinamenduan zinema aretoei adinako mugak jarri izanak auto zinemei. «Garai honetan, negozio seguruenetako bat da, ez baitago inolako kontakturik jendearen artean», esan zuen Javier Castañosek. Getxo auto zinemaren jabeetako bat da.

Pantaila handi bakarrean ikusi dute denek filma, baina soinua norberaren ibilgailuen bozgorailuen bidez entzun dute: irratiaren bidez transmititu diete soinu banda, FMko frekuentzia batean sintonizatuta. Horrez gain, auto zinemako langileek krispetak eraman dizkiete, «maskara eta eskularruak jantzita», antolatzaileek nabarmendu dutenez.

Asteburuan, La La Land filma emango dute (Damien Chazelle, 2016). Antolatzaileen arabera, herritarrak zinemetara itzultzeko «irrikan» daude, eta, ohiko aretoak itxita daudenez, eurek astean hainbat film emateko asmoa dute. Besteak beste, Bohemian Rhapsody, Mamma Mia, Joker eta Parasites emango dituzte. Horrez gain, bestelako kultur ekitaldiak egitekoak dira; tartean, Belako taldearen kontzertua, ekainaren 27an.

Iruñean, Nafarroa Arenan

Getxon, belardi batean dago zinema; Iruñean, berriz, teilatupean. Izan ere, Golem enpresa Nafarroa Arena kirol aretoa erabiltzen ari da auto zinema antolatzeko. Astelehenean ekin zioten. Lehenengo saioa osasungintzako langileentzat antolatu zuten, eta doan eskaini zieten.

Ekainaren amaiera arte eman asmo dituzte filmak. Eguneko bi emanaldi antolatu dituzte, eta hamabostean behin filmak berrituko dituzte. Getxokoa baino apur bat handiagoa da Iruñekoa: 60 auto. Asko jota bi ikusle egon daitezke auto bakoitzean.


Nafarroa Arenako erabilera askotarako aretoan antolatu dute autozinema. Golem / Nafarroa Arena

Sartu aurretik, tenperatura hartzen diete zinemazaleei, eta ohartarazi dute arnasketarekin loturiko sintomak dituztenak ezingo direla sartu, ezta berrogeialdian daudenak ere.


Ikusle bati tenperatura hartzen, Nafarroa Arenako auto zineman sartu aurretik. Golem / Nafarroa Arena

Emanaldia hasi baino ordubete lehenago egon behar dute zinemazaleek aretoan, Eladio Zilbeti kaletik sartuta. Auto motaren arabera antolatzen dituzte barruan, handienak atzean jarrita, logikoa denez. FMko 102,1 frekuentzian ematen dute audioa.

Denetariko filmak emateari garrantzia eman diote programatzaileek: konfinamendua hasi zenetik estreinatu berri zeuden filmak programatu dituzte, baina osteguneko 20:30eko saioa zinemaren klasikoetarako utziko dute.

Iruñean 10 euro kobratzen dute auto bakoitzeko, 5 euro ikusleko, beraz, eta sarrerak Internet bidez saltzen dituzte, baina aretoan bertan ere badago erostea.


Bi ikusle, Nafarroa Arenako auto zineman, krispetak jaten. Golem / Nafarroa Arena

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Hauteskunde Batzordeak bihar aztertuko du Ordiziako egoera

Hauteskunde Batzordeak bihar aztertuko du Ordiziako egoera

Arantxa Iraola - Jon Ordoñez Garmendia

Ordiziako positiboekin lotutako 48 kasu zenbatu dituzte dagoeneko. Maskara erabiltzea nahitaezkoa izango da Gipuzkoako herri horretan, eta tabernetako jarduna mugatu egingo dute. Beste taberna bat itxi dute, langile batek «positibo ahula» eman duela eta.

PCR probak egiten, aste honetan, Ordizian. ©JON URBE / FOKU

Maiatzaren 20tik ez zen hain datu txarrik positibo berrietan

Mikel P. Ansa

Hego Euskal Herrian azkeneko 24 orduetan 35 kasu positibo berri agertu dira PCR probak eginda. Maiatzaren 20an 31 kasu izan ziren, eta hilabete eta erdian ez da hain emaitza txarrik izan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna