Noiz sortua: 2020-06-02 13:23:53

Urkulluk Euskal Herri osoan ibiltzea baimentzeko eskatu die Frantziari eta Espainiari

Jaurlaritzak espero du Araba, Bizkaia eta Gipuzkoa hirugarren fasera pasatuko direla astelehenetik aurrera. Salvador Illak aurreratu du hirugarren fasean ezingo dela erkidego batetik bertzera mugitu.

Gallartako agerraldiaren irudia, Josu Erkorekaren Twitter kontuan agertua
Gallartako agerraldiaren irudia, Josu Erkorekaren Twitter kontuan agertua @Jerkoreka Tamaina handiagoan ikusi

Gotzon Hermosilla -

2020ko ekainak 2

Ekainaren 5ean Ingurumenaren Nazioarteko Eguna izango denez, Eusko Jaurlaritzak Gallartan (Bizkaia) egin du Gobernu Kontseiluaren ohiko bilera, eta bileran eztabaidatu eta onartutakoaren berri eman dute horren osteko agerraldian. Koronabirusaren pandemiaren inguruan, Osasun sailburu Nekane Murgak eta Ekonomiaren Garapeneko eta Azpiegituretako sailburu Arantxa Tapiak berretsi dute Arabak, Bizkaiak eta Gipuzkoak eskatu dutela datorren astelehenetik aurrera hirugarren fasera pasatzeko.

Hirugarren fase horren zenbait ezaugarri azaldu dituzte agerraldian. Tapia sailburuak esan du hirugarren fasera igaroz gero libre izango dela hiru herrialde horietan batetik bestera ibiltzea, eta iragarri du Iñigo Urkullu lehendakariak eskaria egin diela Espainiako eta Frantziako gobernuei, libre mugitzeko aukera hori euroeskualdea osatzen duten hiru administrazioetako lurralde guztietara hedatzeko, hots, Euskal Autonomia Erkidegora, Nafarroako Foru Erkidegora eta Akitania Berrira. Eskaera onartuko balitz, euskal herritarrek aukera lukete Euskal Herri osoan trabarik gabe ibiltzeko.

Tapiak «arrazoi sozioekonomikoak» eman ditu horretarako, bai eta «familiarrak» ere, eta gogorarazi du herritar ugarik familiako loturak dituztela administrazio mugen gainetik.

Arratsaldean etorri da Salvador Illa Espainiako Osasun ministroaren erantzuna. Illak aurreratu duenez, hirugarren fasean ezingo da autonomia erkidego batetik bertzera mugitu. Hala, Illak erran duenez, autonomia erkidego bereko probintzien arteko mugikortasuna onartuko dute, baina ez autonomia erkidego batetik bertze baterakoa. Beraz, Araba, Bizkai eta Gipuzkoa artean bidaiatzen ahalko da, baina, ezingo da Nafarroara edo Iparraldera joan.

Hirugarren fasearen ezaugarriak

Hirugarren fasean, Araban, Bizkaian eta Gipuzkoan garraioak %100ean arituko dira, bidaiari kopuruan zein maiztasunean. Denda eta saltoki handietan gehieneko edukiera %60 izango da. Taberna eta jatetxeetan, berriz, ez da gehieneko bezero kopururik ezarriko, baina bi metroko aldeari eutsi egin beharko diote mahaien artean. Barran kontsumitzea posible izango da, bezeroen arteko tarte hori utzita.

Zinema, kultur ekitaldi eta ikuskizunetan, ikusle kopurua gehienez %50 izango da, eserita, eta sarrera aldez aurretik hartuko da. Areto itxietan antolatutako ekitaldietara gehienez 80 lagun sartuko dira, eta aire zabalean egindakoetara, berriz, 1.000. Pilotan eta arraunketan, goi mailako kirolariek baimenduta edukiko dute entrenatzea.

Tapiak esan duenez, udalekuetako baldintzak ere zehaztu ditu Jaurlaritzak, hirugarren fasera igaroz gero aplikatzekoak. Horiek ere %50ean arituko dira: leku itxietan gehienez 80 lagun, eta irekietan 200, haurrak zein begiraleak aintzat hartuta.

Nekane Murga sailburuak esan duenez, Araban, Bizkaian eta Gipuzkoan atzo bi lagun hil ziren COVID-19aren ondorioz, eta beste lau kutsatu detektatu ziren, laurak Araban.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Udaletako eta Eusko Jaurlaritzako ordezkariak, Zumarragan bilduta. ©/ Ordiziako Udala

Ordiziako fokuan 30 pertsona kutsatu dira oraingoz, eta alkateak «autokonfinatzeko» eskatu du

Irati Urdalleta Lete - Jon Ordoñez Garmendia

Beste hamalau positibo daudela jakinarazi du Osasun Sailak, eta dagoeneko 707 PCRren emaitzak jaso dituzte. Beharrezkoa dela ikusiz gero «irmo» arituko direla ziurtatu du sailburuak. Itxi zituzten Haka, Miami eta Kebab tabernetako zerbitzariek negatibo eman dute. Biharko azoka bertan behera utzi du Udalak, eta kiroldegia, jolas parkeak eta liburutegia itxi ditu. Neurriak zorroztuko dituzte arratsaldean.

Testak egiteko asmoz Ordizian atzo ipinitako karpa. ©JON URBE / FOKU

«Nor ez da ibiltzen hor!»

Arantxa Iraola

Zazpi positibori atxikita, ostatu gune batean ibilitako herritarrei testak egin dizkie Osakidetzak: 900 PCR proba egin dituzte, eta negatibo eman dute lehen 91k. Boluntarioa izan da parte hartzea. Ordizia, Beasain eta Lazkaoko eguneko zentroak itxi egin dituzte, eta zahar etxeetan bisitak kendu dizkiete zazpi egunez. Eskualdeko beste zahar etxeetan, halaber, kalera irteteko aukerarik gabe utzi dituzte bertan bizi diren adinekoak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna