Baliteke ikusleek jaialdia bertatik bertara ikusteko aukera izatea, baina edukieraren erdia bakarrik legoke erabilgarri Uranzu pilotaleku eraberrituan. Ia hiru hilabete dira partidarik jokatu gabe, martxoaren 8an izan baitzen azken jaialdia.
Binakako Txapelketako partida izan zen azkenekoa, eta Olaizola II.a-Aranguren (Urrutikoetxearen ordezkoa) Laso-Albisuren kontra aritu ziren, Bilbon. Finalerdietako ligaxkako lehen jardunaldiko bigarren partida izan zen, eta aurrenekoak izan ziren garaile (22-10). Martxoaren 13an iragarri zuen Enpresen Ligak partidak bertan behera geratuko zirela, eta, zortzi egun geroago, Baiko eta Aspe enpresek iragarri zuten jarduera guztia etengo zutela. Etenaldi horrek eraginda, bi enpresak aldi baterako enplegu erregulazioa ezarri zieten langile guztiei, pilotariak barne.
