Noiz sortua: 2020-06-30 14:29:32

Verterren zabortegiaren inguruan pilatuko dituzte jausitako zakar guztiak

Zabortegiaren azpiko aldean eraiki duten behin-behineko biltegia handitu egingo dute, eta goiko aldean eraikitzekoa zuten biltegia ez dute eraikiko. Biltegi berriaren proiektuak 13,4 milioi euroko kostua du.

Zaldibarko zabortegiko lanak, maiatz hasieran.
Zaldibarko zabortegiko lanak, maiatz hasieran. ANDONI CANELLADA / FOKU Tamaina handiagoan ikusi

Mikel P. Ansa -

2020ko ekainak 30

Eusko Jaurlaritzak bi biltegi handi eraiki nahi zituen zabortegiaren inguruetan, bat azpiko aldean, baserri bati hartutako lurretan, eta bestea zabortegiaren barruan, goiko partean, lurrak egonkorrago dauden eremu batean. Azpiko aldeko biltegi hori eraiki zuten, eta azkeneko asteetan hori erabili dute zabortegian jausi ziren hondakinak eta lurrak metatzeko. Biltegi hori betetzeko zorian dago, baina bigarrena eraikitzen hasi gabeak daude oraindik.

Jaurlaritzak berak gaur jakinarazi du Verter Recycling enpresak berak helegite bat aurkeztu ziola Jaurlaritzaren egitasmoari, eta oniritzia eman diotela helegite horri. Zabortegiaren jabeek proposatu dute azpiko aldeko biltegi horri jarraipena ematea, eta zabortegiaren goiko parteko biltegia ez eraikitzea. Verterrek berak aurkeztutako beste proposamen batzuk bazter batera utzi dituztela zehaztu du.

Aurrera egin duen proiektuaren arabera, eraikia dagoen azpiko biltegi horri jarraipena emango diote. Motia mendiaren magalean dauden bi ezpondatan jarriko dute zaborrarentzako ziega berria. Eremuaren ikerketa geoteknikoak eta hidrologikoak egin dituzte dagoeneko, eta lekua ontzat jo dute. Biltegi berri horrek 804.000 metro kubo zakar hartu ahalko lituzke —zabortegiaren goiko alderako pentsatuta zeukaten biltegiak baino bospasei aldiz gehiago—.

Zakar guztia biltzeko adinakoa

Horrek esan nahiko luke, dagoeneko eraikia dagoen biltegiarekin, zabortegian jausi ziren zakar guztiak bertan biltzeko aukera izango luketela; alegia, 950.000 metro kubo inguru. Biltegi berri horren obra faseka egingo lukete, eta bukatzean, hortaz, zakar guztia zabortegiaren inguruan bertan geldituko litzateke zigilatuta.

Eusko Jaurlaritzako Ingurumen Sailak baloratu du biltegi berriarentzako kokapena, ingurumenean duen eragin txikia eta hondakinak biltzeko ahalmen handiago hori erabakigarriak direla, eta oniritzia eman dio Verterrek planteatutako proposamenari. Horrez gain, uste dute positiboa dela zakarrak zabortegiaren barrutik mugitu ahal izatea, herri guneetan barrena ez direlako ibili beharko.

Hogei hilabeteko epea zehaztu dute biltegi berria eraikitzeko, eta erabat zigilatzeko. Biltegiaren parte bat hilabete barru erabiltzen hasi ahalko direla uste dute, hala ere, eraiki ahala zati batzuk erabiltzen hasteko asmoa baitute. Hartara, Joaquin Beltran eta Alberto Sololuze langileen gorpuak bilatzeko lanekin jarraitu ahal izango dute. Orain mugitzen ari diren lur eta zakarrak eramaten ari diren biltegia betetzen ari da, eta aurki beharko dute beste leku bat, zakar horiek guztiak pilatzeko.

120 metro luze, hogei metro garai

Aukeratutako bi ezponda horietan dike bat eraikitzeko asmoa dute. Dike hori 120 metroko luze, hogei metroko garaiera eta zortzi metroko zabalera izango du dike horrek bere goiko aldean. Lixibiatuak-eta sor ez daitezen, iragazgaitz bihurtu beharko dute, gainera. Verter berak aurkeztu du biltegia eraikitzeko proiektua, eta 13,4 milioi euroko kostua izango duela zehaztu du.

Erabaki horrekin, Verterrek zabortegiko zakarra bildu eta zigilatzeko eta sortutako arazoari konponbide bat emateko konpromisoari ekingo dio, biltegi berriak balioko duelako horretarako ere. Otsailean, zabortegia jausi zenean, obrei ekiteko ezintasun erabatekoa zuela argudiatu zuen enpresak, eta Eusko Jaurlaritzak modu subsidiarioan ekin zien lanei. Horrek esan nahi du lan horien kostua bere gain hartu beharko duela zabortegiaren jabeak. Jaurlaritzak Verterri eskatu zion obren erantzukizuna hartzeko, eta proposamen honekin hartu du erantzukizuna enpresak, hondamendia gertatu eta ia lau hilabete geroago.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Larrialdi zerbitzuek behin-behineko ospitale bat jarri dute Lleidan. ©Ramon Gabriel / Efe

Kataluniako Gobernuak konfinamendua ezarri die 200.000 herritarri

Berria

Lleidako eskualde batean koronabirusaren zortzi agerraldi detektatu dituzte. Eguerdian jarri dute indarrean.

Osasun langileak lanean, Gurutzetako ospitalean. ©MARISOL RAMIREZ / FOKU

Auzitegi Nagusiak dio Osakidetzak ez zuela babes baliabide nahikoa

Ainhoa Larretxea Agirre - Irati Urdalleta Lete

Osakidetzak «ontzat» jo du ebazpena, «ez dituelako aintzat hartu sindikatuen eskaera gehienak». ESK sindikatuak jarri zuen salaketa, eta ekainaren 16an egin zuten epaiketa

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna