Zortzi foku nagusi izan dira ekainetik Euskal Herrian

 
PCR proba bat egiten, Zarautzen. /
PCR proba bat egiten, Zarautzen. / Gorka Rubio/Foku Tamaina handiagoan ikusi

Berria -

2020ko uztailak 7

Konfinamendua arintzen hasi zenetik, zortzi foku nagusi sortu dira Euskal Herrian. Ordiziakoa izan da azkenekoa. Kutsatze kate gehienak eten dituzte, eta denak kontrolpean dauzkatela esana dute agintariek. Ordiziakoarekin dago kezka, oraindik ez delako argitu noraino zabaldu den. Hauek dira kasuak:

Oriokoa

Azkeneko agerraldietako bat Orion (Gipuzkoa) izan da; ekainaren 19an detektatu zuten aurreneko kasua, eta elkarrekin harremana duten bi familiaren eta haien ingurukoen artean 23 lagun kutsatu dira. Agerraldia Orion detektatu zuten, baina ondoko herri batera ere zabaldu da, Aiara. Donostiako kasu batzuek horiekin lotura duten aztertzen ari dira. Oraindik ez dakite kontrolpean dagoen, edo kutsatu gehiago agertuko diren: ekainaren 26an atzeman dituzte azkeneko kasuak, lau.

Malerreka-Bortzirietakoa

Orioko kasuarekin bateratsu baieztatu dira beste bi agerraldi Nafarroan, Iruñerrian bata eta Malerreka-Bortziriak aldean bestea. Nafarroako Gobernuak kutsatze kopuruen «gorakada» bat gertatu zela jakinarazi zuen ekainaren 22an, baina ez du eman datu xeherik. Jakin da, halere, fokuetako bat Sunbillan dagoela; familia topaketa batean zabaldu da gaitza. Gobernuak berak jakinarazi du talde horretan eta haien harremanetan badirela gutxienez hamasei pertsona kutsatuta. Donezteben ere badira bi pertsona kutsaturik, eta Beran lau bat —horietako bat behintzat Irunen bizi da—; hango galdategi batekin harremana du kutsatuetako batek, eta PCR probak egin dizkie Nafarroako Gobernuak langile guztiei; lantegi horretan zazpi pertsona dira kutsatuak.

Iruñerrikoa

Iruñerriko fokuari buruz gobernuak apenas eman duen informaziorik. Jakin da otordu bat egiteko elkartutako bikote batzuen artean zabaldu dela gaitza, Iturraman, baina xehetasunik ez dago gehiago, eta ez dago argi zenbat jende gehiago kutsatu den ere. Santos Indurain Osasun kontseilariak ukatu egin zuen gaitzaren «agerraldiak» zirela azkeneko bi gertakari horiek, familia giroan gertatu zirela argudiatuta; baina, gerora, ekainaren 25ean, gobernuak berak «agerraldi» izendatu ditu.

Arrasatekoa

Aita Menni erietxeko lau langileri eta tutoretzapeko pisu batean lan egiten duen langile bati aurkitu zieten gaitza, ekainaren 13aren bueltan. Etxean bakartzeko agindua eman zieten bost langileei, eta kezka sortu zen, kasuak oso inguru gertukoak eta bat-batean agertu zirelako, baina geroztik ez da kasu berririk agertu horiei lotuta.

Basurtukoa

Ekainetik aurrera, erietxeetan izan ditu gaitzak aurreneko agerraldi indartsuak. Basurtuko erietxean sortu da orain arte fokurik handiena. Ekainaren 4an harrapatu zuten aurreneko kasua han: Revilla pabiloian zegoen gaixo bati detektatu zioten, eta berehala haren laguntzaileari. Gaitzak 45 pertsona kutsatu ditu harrezkero; tartean dira langileak, erietxean zeuden gaixoak, eta bisitariak ere bai. Hil egin da agerraldian kutsatutako gaixoetako bat. Eusko Jaurlaritzak sarritan esan du kontrolpean dagoela agerraldia. Ospitale bereko beste pabiloi batean ere alertan egon dira, ordea: Iturrizarren haurdun bati detektatu zioten gaitza. Erditzeko gelak itxi egin zituzten. Ekainaren 15etik aurrera, moteldu egin da kutsatze katea, eta ekainaren 23tik aurrera ez da beste positiborik izan foku honi lotuta.

Jesusen Zerbitzarietakoa

Basurtuko erietxean bisitan izandako moja batek bere kongregaziora eraman zuen gaitza, eta harrezkero zortzi lagun kutsatu dira Bilboko Jesusen Zerbitzarien zahar etxean. Ekainaren 20an jakinarazi zuten bi moja, hiru egoiliar eta hiru langile kutsatu direla han. Gaixotu guztien berri batera eman zuten, eta harrezkero ez dute bete positiborik jakinarazi.

Txagorritxukoa

Basurtuko agerraldiarekin ia batera gertatu zen Txagorritxukoa. Ekainaren 6an atzeman zuten lehen gaixoa, eta, hamar egunean, ekainaren 16rako, hamabost ziren kutsatutakoak; tartean, pazienteak, langileak eta bisitariak. Harrezkero ez da beste positiborik jakinarazi erietxe horretan. Agerraldian kutsatutako gaixo bat hil da. Eguneko zentroa ere itxi zuten ekainaren 22an, erabiltzaile bat gaixorik zegoela konturatu zirenean; ez du ematen horrek kate luzeagorik izan duenik. Txagorritxu zen koronabirusarentzako Arabako erreferentziako ospitalea, eta hura izan zen gaitzaren aurreneko fokua, otsailaren 28an han agertu baitziren aurreneko gaixoak.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Txagorritxuko erietxean, COVIDaren test serologikoak aztertzen. ©G. RUBIO / FOKU

Eritasunari buruzko lezio berrikusia

Arantxa Iraola

Asko falta da oraino, baina COVID-19aren inguruko ezagutzak egunero ari dira argitzen, osatzen; ondorioz, izurriaren hasieran gaitzaz esan ziren hainbat gauza zahartuta eta atzeratuta geratu dira guztiz. Etengabeko berrikusketa eskatzen du gai honek.

Angeluko hondartza. ©Guillaume Fauveau

Maskara derrigorrezkoa izango da Ipar Euskal Herriko hainbat herritan ere

Olatz Esteban Ezkati

Berrehun positiboren langa gainditu da seigarren egunez jarraian Hego Euskal Herrian: 224 kasu izan dira azken orduetan. Gipuzkoako tabernariak kexu agertu dira Jaurlaritzaren murrizketak direla eta

Emakume bat oinez Donostian, erosketen poltsak eskuetan, joan den apirilean. ©GORKA RUBIO / FOKU

Zaurgarrienak, zaurgarriago

Maddi Ane Txoperena Iribarren

Pandemiak emakume eta gizonen arteko desberdintasunak sakondu dituela ondorioztatu du Emakunderen txosten batek. Egoera hobetzeko gomendioak eman dizkie erakundeei

Jedea Bilboko metrotik irteten, maskara jantzita ©Luis Tejido/EFE

Berrehun positiboren langa gainditu da seigarren egunez jarraian Hego Euskal Herrian

Berria

Azken orduetan 224 kasu atzeman dituzte. Positiboetatik 123 Bizkaian detektatu dira.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna