Berriro mugimendu bat espetxe arloan

Etxerat elkarteak atzo jakinarazi zuen Espainiako Espetxeetako Erakundeek beste bi euskal preso gerturatu dituztela Euskal Herri inguruko kartzeletara —Josune Oña Alacant I-eko espetxetik (745 kilometro) Logroñokora (170 km) eta Gari Arruarte, Almeriakotik (1.005 km) Soriakora (260 km)—, eta bi horiekin, Madrilek azkeneko lau astean, hilabeteetako eten bati bukaera emanda, euskal presoei dagokienez 21 mugimendu egin ditu.

PSOE 2018ko ekainean Espainiako Gobernura iritsi zenean, batez ere urte hartako azaroan hasi zen euskal presoen mugimendu batzuk egiten. 2019an Espainiako Gorteetarako bi hauteskundeak egoteak —apirilean eta azaroan— geldialdi bat ekarri zuen, eta ondoren segitu zuen geldialdiak COVID-19agatik. Duela aste batzuk hasi ziren berriro mugimendu batzuk egiten. Hala ere, Espainiako Gobernuak oraindik ez du iragarri espetxe politikaren aldaketa.

Ekainaren hirugarren astetik aurrera bost Euskal Herriratze egin ditu Madrilek: Francisco Jose Ramada (Iruñera, Murtzia I-etik), Kepa Arronategi (Aita Menni Arrasateko zentrora, Zueratik), Igor Gonzalez Sola (Iruñera, Soriatik), Jagoba Codo (Martutenera, Logroñotik) eta Fernando Alonsorena (Martutenera, Villabonatik), eta iragarriak ditu Sebas Etxaniz (Martutenera, Villabonatik) eta Oier Urrutiarena (Langraizera, Logroñotik). 2018ko udatik 2019 amaitu arte bost Euskal Herriratze egin zituzten Espetxeetako Erakundeek.

Gerturatzeak, zazpi izan dira ekainaren erditik aurrea: Alvaro Arri Pascual (Burgosera, Castellotik), Asier Mardones (Logroñora, Alacantetik), Gorka Lupiañez (Logroñora, Topasetik), Jose Luis Barrios (Zuerara, Granadatik) eta Asier Rodriguezena (Soriara, Granadatik), eta aipatutako Josune Oña eta Gari Arruarterena. 2018ko udatik 2019 bukatu arte 26 euskal preso hurbildu zituzten Euskal Herri inguruko kartzeletara.

Joan den apiril bukaeratik zazpi euskal presori eman diete hirugarren gradua: Jagoba Codo, Fernando Alonso, Xabier Agirre, Jose Ramon Foruria, Sebas Etxaniz, Txus Martin eta Oier Urrutiari. 2018ko udaztik 2019 amaitu arte, bosti.

BERRIAren datuen arabera, espetxean 239 euskal preso daude gaur egun: Euskal Herrikoetan 8 —2, zentroan—, Espainiako Estatuko besteetan 195 eta Frantziakoetan 36.