Albistea entzun

Zinema

Arbid, Crespo, Macqueen eta Templeren filmak Urrezko Maskorraren lehian

Donostiako 68. Zinemaldiko Sail Ofizialean erakutsiko dituzten beste bost lanen berri eman du jaialdiak. Matt Dillonek zuzendutako 'El gran Fellove' dokumentalaren emanaldi berezia ere egingo dute, lehiaz kanpo.

Danielle Arbid zuzendariaren 'Passion simple' filmaren fotograma bat
Danielle Arbid zuzendariaren 'Passion simple' filmaren fotograma bat Donostiako Zinemaldia Tamaina handiagoan ikusi

Amaia Igartua Aristondo -

2020ko abuztuak 6

Donostiako Zinemaldiak Sail Ofizialean lehiatuko diren beste lau filmen izenak iragarri ditu. Honako hauek egongo dira 68. jaialdiko Urrezko Maskorra lortzeko hautagaien artean: Danielle Arbiden Passion simple, Eduardo Cresporen Nosotros nunca moriremos, Harry Macqueenen Supernova eta Julien Templeren Crock of Gold: a Few Rounds with Shane MacGowan. Lehiaketatik kanpo, baina Sail Ofizialean hori ere, Matt Dillonen El gran Fellove egongo da ikusgai; Emanaldi Berezien barruan emango dute Francisco Fellove (1923-2013) musikari eta abeslari kubatarrari buruzko dokumental hori. Ezaguna zaio aktore estatubatuarrari Zinemaldia, 2006an Donostia saria eman baitzioten bere antzezle ibilbideagatik. Aurten, kameraren beste aldean egindako lan batekin aurkeztuko da, zuzentzen duen bigarren pelikularekin, hain zuzen.

Dillonen ekoizpena ez da izango musikaren inguruan arituko den bakarra, Julien Templerenak ere adierazpide bera baitu mintzagai. The Pogues taldeko abeslari eta konpositore Shane MacGowan du protagonista zinemagile britainiarraren Crock of Golden lanak. Johnny Deep aktoreak ekoitzi du, eta taldearen eta MacGowanen familiaren artxiboko irudi argitaragabeen eta Ralph Steadman ilustratzailearen animazioen bitartez ondu du lana Templek. Hark ere ez du lehen aldia izango Zinemaldian: 1989an, Epaimahai Ofizialeko kide izan zen, eta, 2010ean, The Filth and the Fury dokumentala proiektatu zen .doc – Ez fikzioaren bide berriak atzera begirako tematikoan.

Abeslari eta poeta irlandarraren inguruko obra ez-fikziozko bakarra izango da, baina Danielle Arbiden Passion simple-k ere asko du errealitatetik: Annie Ernauxen izen bereko eleberri motzean oinarrituta dago, eta liburu horrek, idazle frantziarraren gainerako obra guztiek bezala, egilearen beraren bizitza du lehengai. Zinemagile frantziar-libanoarraren pelikulan, gizon batekin joan-etorriko harreman bat duen andre baten istorioa kontatzen da; apenas ezagutzen duen amorante horren zain dago emakumea, harekin bizitakoak eta hura bera burutik kendu ezinda. Cannesko Zinemaldian zen estreinatzekoa, baina, koronabirusaren eraginez, bertan behera utzi zituzten jaialdiko emanaldiak. Horrenbestez, Donostian ikusi ahal izango da lehen aldiz Canneseko jaialdiaren zigilua daraman lan hori.

Harry Macqueen britainiarraren Supernova filmak ere bikote bat du ardatz, baina Samek eta Tuskerrek hogei urteko maitasun harreman sendoa dute. Bi urte atzera, fase goiztiarreko dementzia diagnostikatu zioten Tuskerri; oraindik aukera dutenez, errepideko bidaia bat egitea erabakitzen dute, lagun eta senideekin berriro ere elkartzeko eta iraganeko lekuak bisitatzeko. Bidaiak hainbat irakaspen utziko dizkie: konturatuko dira etorkizunari buruzko ideia desberdinak dituztela, bestearen sekretuak jakingo dituzte...; bakoitzaren plan pribatuak agerian geratuko dira, baina baita elkarri dioten maitasuna ere.

Eduardo Crespo argentinarraren hirugarren filmak, Nosotros nunca moriremos izenekoak, familia du ardatz. Haur batek eta haren amak bidaia bat egingo dute, seme nagusia hil den lekura, hain zuzen. Han, doluaren hasiera igaroko dute; Rodrigo izeneko haurrak haurtzaroa atzean utziko du konturatu gabe, eta haren ama semearen heriotzaren ingurukoak argitu nahian ibiliko da.

Sail Ofiziala, osatzen

Bost filmak aurreko asteetan jaialdiak iragarritakoei gehitu zaizkie. Sail Ofiziala osatuko duten lanen atzean, hainbat zinemagile entzutetsuren izenak ageri dira: besteak beste, Pablo Aguero (Akelarre), Sharunas Bartas (In The Dusk), Naomi Kawase (Asa Ga Kuru), Antonio Méndez Esparza (Courtroom 3H), François Ozon (Été 85) eta Thomas Vinterberg (Druk) izango dira Urrezko Maskorra irabazteko lehian. Horiek baino ibilbide laburragoa duten errealizadoreak ere badira zerrendan, tartean, Dea Kulumbegashvili (Dasatskisi) eta Takuma Sato (Nakuko wa ineega).

Woody Allenen komedia berriarekin, Rifkin´s Festival-ekin, hasiko da Sail Ofiziala. Lehiaketatik kanpo emango dute Allenen lanik berriena. Bi telesail ere izango dira ikusgai aurten: Rodrigo Sorogoyenen Antidisturbios eta Aitor Gabilondoren Patria. Irailaren 18tik 26ra egingo dute aurten jaialdia.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Jone Laspiur, atzo, emakumezko aktore berririk onenaren saria telematikoki jasotzen. ©Miguel A. Cordoba / EFE

Euskal filmek zortzi sari jaso dituzte Goya sarietan

Paulo Ostolaza

Bost garaikur eskuratu ditu Akelarre pelikulak, eta hiru Ane-k. Emakumezko aktore protagonistarik onenaren saria Patricia Lopez Arnaiz gasteiztarrari eman diote, eta emakumezko aktore berririk onenarena Jone Laspiur donostiarrari.

1 ©ALEMANIAKO ARTXIBO FEDERALAK / EZEZAGUNA

Goeringen artekaria gure artean

Amagoia Gurrutxaga Uranga

Bigarren Mundu Gerra garai oparoa izan zen naziek espoliatutako artelanen negozioan sartzeko prest zeudenentzat. Horietako bat izan zen Alois Miedl enpresaria. Artelan ugari pasarazi zituen Euskal Herritik barrena, Espainiako eta Portugalgo merkatuetara bidean. Hainbat euskal herritar izan zituen laguntzaile horretan.

Sarah Mary Chadwick abeslari eta pianista. ©BERRIA

Minari amaiera emateko biluztea

Mikel Lizarralde

Bi heriotza, harreman baten haustura eta suizidio saiakera bat. Mina eta samina dario Sarah Mary Chadwick musikariak azken bi urteetan ondu duen trilogiari. 'Me and Ennui Are Friends, Baby' du azken alea.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna