Euskara

Irailaren 21etik 27ra iraganen da Mintza Lasai festibala

«Beste transmisio bat posible» dela aldarrikatuko du Baionan, Angelun eta Miarritzen euskararen biziberritzea elikatzea xede duen festibalak. Osasun egoeragatik egitaraua murriztu behar izan dute.

Aurtengo ekitaldiaren aurkezpena.
Aurtengo ekitaldiaren aurkezpena. Guillaume Fauveau Tamaina handiagoan ikusi

Ekhi Erremundegi Beloki -

2020ko irailak 16

«Birusak ez du euskara geldituko». Hala aldarrikatu du Gilen Zaldunbide Angeluko (Lapurdi) euskaltzaleak. Mintza Lasai festibalaren antolaketan parte hartzen du urtero, eta aurten ere buru-belarri aritu da. Osasun egoera berezia izanik ere, azaldu du aurtengoa ere atxikitzea erabaki dutela, baina programazioa murriztu behar izan dutela. Berez aurreikusiak ziren 45 ekitaldietatik hogei bat baizik ez dira izanen, eta Miarritzeko (Lapurdi) Marion lakuaren inguruan egitekoa zen egun osoko egitaraua bertan behera utzi dute.

«Frustrazioa» aipatu du Viviane Ithursarri Miarritzeko euskara teknikariak, baina, hala ere, programazio «polita» osatzea lortu dutela. Astelehenetik igandera, zazpi gairen inguruan arituko dira, egun bakoitzean bat. Tailerrak, hastapenak, film emanaldiak, hitzaldiak... aurten ere denetik izanen da, hiru hirietako elkarteek proposaturik, eta osoki euskaraz. Egitarau osoa Mintza Lasai webgunean aurkitu daiteke. Ekitaldi bakoitzean segurtasun neurriak beteko dituzte, eta aitzinetik izena emateko eskatu dute, lekuak mugatuko dituztelako.

Aurten ere Miarritze eta Baionako herriko etxeen babesa jaso du Mintza Lasai festibalak. Anne Pinatel Miarritzeko hizkuntza politikarako axuantak berretsi du ondoko urteetan «euskararen garapena babesten» segituko dutela. Xabier Parrilla Baionako hizkuntza politikarako axuantak, berriz, «politika handinahiak» iragarri ditu; «Baionak euskaraz mintzatu behar du».

Osasun egoerak aurtengo festibala baldintzatu badu ere, Ithursarrik azpimarratu du jadanik heldu den urtekoari begira ari direla. X. aldia izanen da, eta erran du lan eginen dutela oraindik «ederragoa eta handiagoa» izateko.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Bi pertsona maskarak soinean daramatzatela, autobusean. ©JUAN CARLOS RUIZ / FOKU

Lau gako asintomatikotasunaz

Arantxa Iraola

Kutsatu guztiek ez dituzte izaten sintomak. Adituek diote COVID-19an positibo emandakoen erdiek-edo, birusa izan arren, ez dutela batere sintomarik. Horrek zaildu egiten du izurriaren kontrola.

Herritar batzuk kalean maskara jantzita, Frantzian. ©CAROLINE BLUMBERG / EFE

Birusaren bigarren oldarraldia

Jone Bastida Alzuru

Kasuek ugaritzen jarraitzen dute munduan, eta hainbat herrialdek neurriak zorrozteko erabakia hartu dute. Israelek joan den ostiralean indarrean sartutako itxialdia gogortu du

Langile batzuk kaleak desinfektatzen, atzo, Azkoienen (Nafarroa). ©Idoia Zabaleta / Foku

Bigarren egunez, 800 kasu baino gehiago atzeman dituzte Hegoaldean

Uxue Rey Gorraiz

Osakidetzak jakinarazi du 9 urteko ume bat hil dela, birusa izanda. Positiboek gora egin dute Araba, Bizkai eta Gipuzkoan; Nafarroan, ez

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna