Katalunia

Torrak ez du hauteskundeetara deituko inhabilitatua izan aurretik

Kataluniako presidenteak gaineratu du ez dela "oztopo bat" izango Espainiako Auzitegi Gorenak bere kontrako epaia berresten badu. Gorenak goizean egin du erabakia aztertzen hasi aurreko azken auzi saioa.

Quim Torra Generalitateko presidentea. /
Quim Torra Generalitateko presidentea. / Quiqe Garcia/EFE Tamaina handiagoan ikusi

Arantxa Elizegi Egilegor - Gorka Berasategi Otamendi -

2020ko irailak 17

Quim Torra Kataluniako presidenteak hedabideen aurrean hitz egin du, Espainiako Auzitegi Gorenak bera inhabilitatu ala ez erabaki aurreko azken auzi saioa amaitu eta minutu gutxira. Torrak ohartarazi duenez, Gorenak bera inhabilitatzeko "erabaki arduragabea" hartzen badu, "Espainiako Estatua izango da errudun bakarra". Presidenteak gaineratu du ez dela bera izango herrialdeak koronabirusaren pandemiarengatik bizi duen "une hain kritikoan" hauteskundeetara deituko duena, horrek Kataluniako administrazioa geldiaraziko lukeelako. Aldi berean, adierazi du ez dela prozesu "oztopo bat" izango, eta ez duela "inolako anbizio pertsonalik" Kataluniako independentzia lortzeko "proiektu kolektiboaren gainetik".

Torrak kontraesan batean ikusten du Espainiako Estatua: batetik, "bere burua aurrerakoitzat daukan" Espainiako Gobernu bat dela esan du, baina, bestetik, egoera politikoak eta judizialak bere horretan jarraitzen duela Mariano Rajoyren gobernuaz geroztik. "Berehalako zuzenketa irmo bat egin ezean, Espainiak bere porrota baieztatuko du Europako estatu moderno gisa", adierazi du. Haren esanetan, Kataluniako herritarrek bi aukera dituzte: "Europan lotsa eragiten duen Espainia erregezale baten gainbehera ala oinarri zibikoen gainean eraikitako Kataluniako Errepublika".

Espainiako Auzitegi Gorenak Kataluniako presidentea inhabilitatuko balu, egoerak hauteskundeak behartu litzake. Orain arte, beste presidenterik ez izendatzearen alde agertu dira alderdi independentistak, eta, beraz, araudiak aurreikusitako epeak amaitutakoan, Kataluniako Parlamentua automatikoki desegingo litzateke.

Iazko apirileko Kataluniako bozen harira politikari presoen aldeko xingolak «garaiz» ez kentzeagatik, Kataluniako Justizia Auzitegiak Quim Torra Generalitateko presidentea urte eta erdiko inhabilitazioa eta 30.000 euroko isunarekin zigortu zuen. Hark, baina, helegitea jarri zion erabakiari, eta Espainiako Auzitegi Gorenak izango du auziari buruzko azken hitza. Aurreko erabakia berretsiko balu, irmoa izango litzateke, eta berehala sartuko litzateke indarrean; dena den, Generalitateko buruak Konstituzionalera jotzeko aukera izango luke oraindik.

Europako zuzenbideari begira

Eguerdian hasi da auzi saioa Gorenean. Aldeak bildu dira epaimahaiaren aurrean. Quim Torra Kataluniako presidentearen defentsa, batetik, Gonzalo Boye abokatua buru, eta Espainiako Fiskaltza eta Vox eskuin muturreko alderdiren herri akusazioa bestetik. Boyek Kataluniako Auzitegi Nagusiaren epaia baliogabetzeko helegitea aletu du. Hura aintzat ez hartzeko eskatu diete akusazioek Goreneko magistratuei.

Gonzalo Boye abokatuak argudiatu du adierazpen askatasunak babesten duela Torrak xingola horiak eta Preso politikoak, askatasuna zioen pankarta Generalitatearen jauregian jarri izana, eta Kataluniako Auzitegi Nagusiak jarri zion zigorra «neurrigabea» izan zela.

Horrez gain, defentsa abokatuak Gorenari eskatu dio bideratu ditzala epaitu aurreko zenbait galdera Europako Batasuneko Justizia Auzitegira, hark argitu dezan zilegi izan ote litekeen Torra Europako Parlamenturako bozetarako inhabilitatzea, eta ez ote den gehiegizkoa neurri hori xingola batzuk eta pankarta bat kentzeari uko egiteagatik. Boyeren esanetan, Torraren kasuan ez dira ezarri "Europako zuzenbidearen irizpideak". Hala, ohartarazi du auzitegiak defentsaren helegitea onartzen ez badu "beste gatazka juridiko baten hasiera" izango dela, Europara joko dutelako. Erantzun "arduratsua" eskatu dio epaimahaiari. "Sententzia on bat denboraren joana eta helegiteen pisua jasaten duena da".

Auzi saiora sartu aurretik egin dituen adierazpenetan ere Europako zuzenbidearen garrantzia nabarmendu du. "Orain arte ez dugu sekula ere galdu: beti irabazi baitugu Europan. Espainia Europako Batasuneko kide da eta, beraz, prozesu hau Europako erakunde judizialetan amaitzen da".

Boyek ziurtatu du Espainiako Hauteskunde Batzordeak ez duela eskumenik Torrari pankarta eta xingola horiak erretiratzea agindu ahal izateko. Erakunde horren eta Kataluniako Auzitegi Nagusiaren "lerrotzea" ere salatu du.

Fiskaltzak eta Voxen herri akusazioak, berriz, nabarmendu dute Gorenak ez duela inolako beharrik epaitu aurreko arazorik aztertzeko. Gaineratu dute horretarako ezinbesteko baldintza dela epaimahaiak arau baten edo haren aplikazioaren inguruko "zalantzak" izatea, eta Torraren auzia "argia" dela.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

PCR proba bat, Gurutzetako ospitalean. ©Luis Jauregialtzo, FOKU

Positibo kopuruak goia jo du Nafarroan

Uxue Rey Gorraiz

Beste 749 kasu atzeman dituzte Hegoaldean, eta nabarmen ugaritu dira Nafarroan: 362 kutsatu detektatu dituzte azken egunean. 501 lagun daude erietxeratuta Hego Euskal Herrian, eta 82 gaixo daude ZIUetan.

Zestoa, artxiboko irudi batean. ©Gorka Rubio / Foku

Eraikin publikoak eta tabernak itxi dituzte Zestoan

Berria

28 kasu baieztatu dituzte azken egunetan, eta neurri murriztaileak hartu dituzte agerraldiari aurre egiteko asmoz. Datozen egunetan egoera «kontrolatzea» espero dute.

Iñigo Urkullu omenaldian ©Eusko Jaurlaritza

Koronabirusaren biktimak omendu dituzte Gasteizen

Uxue Rey Gorraiz

Iñigo Urkullu lehendakariak gidatu du ekitaldia. Pandemiarengatik hildakoak gogoratu ditu, eta elkartasuna adierazi die familiei. «Elkarrizketa soziala» bultzatu dadin galdegin du, bizikidetza sozialaren berreraikuntzarako.

Sindikatuen eta Sareren elkarretaratzea, presoen egoeraren harira Bilbon. ©Marisol Ramires/FOKU

Hainbat espetxetan komunikazioak eten dituztela salatu dute Sarek eta Etxerat-ek

Maria Ortega Zubiate

Presoek eta haien senideek “garai oso zailak” bizi dituztela adierazi dute bi elkarteek, eta pandemiak “salbuespenezko erregimenaren aplikazioa” areagotzen duela. Positibotzat jo dituzte Eusko Legebiltzarrean eta Espainian espetxe politika aldatzeko egindako adierazpenak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna