Albistea entzun

Gazte mugimendua

Ibilbideari bukaera eman dio Aitzina Gazte Antolakundeak

Gazte ezkertiar eta abertzale ororen espazioa izateko eta euskal gazteria eta herri gisa «ditugun erronkei» behar besteko eraginkortasunez erantzuteko «ezintasuna» aipatu dute bukaera iragartzeko agirian. Hilabete batzuetako epean «beharrezkoak diren gogoeta, harreman eta eztabaidei» bide emanen diete, «indarrak bildu eta euskal gazteriak tresna berriak sor ditzan».

Aitzinak antolatutako mobilizazioetako bat, Donibane Lohizunen, 2016an.
Aitzinak antolatutako mobilizazioetako bat, Donibane Lohizunen, 2016an. Isabelle Miquelestorena Tamaina handiagoan ikusi

Ekhi Erremundegi Beloki -

2020ko urriak 5 09:48

Ipar Euskal Herriko gazte ezkertiar eta abertzaleen bilgune izateko sortu zen Aitzina gazte antolakundeak bere ibilbidea bukatzea erabaki duela jakinarazi du ohar batean. «Argi dugu, azken boladan Aitzinak jadanik ez ziela behar bezalako eraginkortasunez erantzuten euskal gazteria eta herri gisa ditugun erronkei», adierazi dute. Gazte ezkertiar eta abertzale ororen espazioa izateko «ezintasuna» aipatu dute, eta «hutsuneak» izan dituztela Hendaiatik (Lapurdi) Eskiulara (Zuberoa ), eta Bardozetik (Lapurdi) Urepelera (Nafarroa Behera) existitzen diren «errealitate, problematika eta erronka anitzei» erantzuterako orduan. «Abagunea aztertu, egoera barneratu, urte gorabeheratsu hauek baloratu eta heldutasunez, uneak eskatzen digun erabakia hartu dugu kolektiboki; Aitzina gazte antolakundearen ibilbideari bukaera ematea».

Gazteriaren baitan «engaiatzeko forma eta gai berriak» agertu ahala, 2010eko hamarkadako «militantzia asmatzeko zeregin zailak» markatu du Aitzinaren ibilbidea, azken oharrean idatzi dutenez.«Autokritika zintzoa egiten ari gara eta egiten segituko dugu. Irakaspenak atera behar ditugulako batetik ; eta bestetik, euskal gazteriari zor diogulako». Hala, gazte esparrutik Euskal Herriaren askapen prozesuari ekarpena egiteko «ardura historikoa» beren gain hartzen dutela erran dute: «haria ez da etengo». Zehaztapenik eman gabe, hilabete batzuetako epean «beharrezkoak diren gogoeta, harreman eta eztabaidei» bide emanen dietela jakinarazi dute, «indarrak bildu eta euskal gazteriak tresna berriak sor ditzan». Aitzinaren ustez, «ideia ezkertiar, abertzale, feminista eta ekologistak jendartearen gero eta sektore gehiagorengana hedatzen ari diren honetan, Ipar Euskal Herrian nehoizko baldintzarik onenak ditugu aipatutako askapen prozesuan aitzina pausoak egiteko».

Azken oharraren bidez, «esker berezia» helarazi diete azken urteetan Aitzinaren «parte, bidelagun eta burkide» izan diren guziei, eta «akatsak akats», Aitzinako militanteek izandako «ausardia» goraipatu dute. «Injustizien aurka altxatzeko ausardia, ekintzetan gure gorputzarekin gure ideiak defendatzekoa, konfluentzia guneak sortzen entseatzekoa edo feminismotik gure antolakundea ere zeharkatzen duen zapalkuntza patriarkala errotik mozteko ekitekoa...».

Aitzinaren agerraldia, frantsesez bakarrik idatzitako bide seinaleak kentzeko aldarrikatzeko. SYLVAIN SENCRISTO

Zazpi urteko ibilbidea

2013ko azaroaren 2an sortu zen Aitzina gazte antolakundea, Baionan egin zuten ekitaldi jendetsuan, hilabete batzuk lehenago Orain dun/k tenorea prozesua aitzina eraman ondotik. Lehenago, Gazteriak-ek, Haikak eta Segik izandako lekua hartu zuen. Euskal Herri mailan, Ernai gazte antolakundearekin lotura estua izan du azken urteetan, eta hainbat ekitaldi elkarrekin antolatu izan dituzte. 

2013. urtea bukatu aitzin, euskara, gazteen zatiketari gaina hartzea eta nazio identitatea oinarri abiatu zituen lehen kanpainak Aitzinak. Baionako suprefetura aitzinean egin zuten lehen ekintza. Ikatza bota zuten «Frantziako Estatuak ikastolen aurka eramaten duen gurutzada» salatzeko. 2014. urtean, frantses hutsean idatziak ziren bide seinale zenbait kentzeari ekin zion, «Frantziako Estatuak euskal gizartearekiko duen jarrera zapaltzailea» salatzeko. Bide seinale horiek «urteetan eraman asimilazio prozesuaren sinbolotzat» jo zituen, eta Parisera zihoan tren batean sartu zituen, Frantziari itzultzeko. Ekintza horren ondorioz, Aitzinako kide bat atxilotu, eta gazte antolakundeak Baionan duen egoitza miatu zuen Frantziako Poliziak 2014ko urriaren 7an. Baina «ildo beretik» segitzeko borondatea agertu zuten gazteek. «Desobedientzia zibila erabiliz, gure herriaren nortasuna ukatzen duten sinboloak kenduz segituko dugu». Gerora, gazte gehiago ere atxilotu zituzten ekintza horiengatik. 2014ko abenduan, euskarazko bide seinaleak jarri zituen Aitzinak Ipar Euskal Herriko hamabost tokitan, Ipar Euskal Herriko onarpen instituzionala eta euskararen ofizialtasuna aldarrikatzeko.

Zazpi urteko ibilbidean, ekintza andana egin ditu gazte antolakundeak, eta hainbat aldarri plazaratu ditu. Aipagarriak dira, besteak beste, Aitzinak bultzatutako talde feminista, Guk EH kanpaina, eta G7koen goi bileraren kontra bultzatutako Oldartu gazte dinamika. Baina, arazoak ere aurkitu ditu ibilbidean zehar. 2016ko udan hasi eztabaida saioa abiatu zuten Aitzinako kideek, antolakundearen «efizientzia politiko eskasaren arrazoiak» identifikatzeko; gogoeta horren ondorio gisa, antolatzeko eredu berria proposatu zuten 2017ko urrian. Baina badirudi azken urteetan ez dutela lortu nahi zuten dinamika martxan ematen, gazte antolakundearen ibilbidearen bukaera iragarri baitute gaur. Aitzina segitzeko aldarriarekin eman dute azken hitza: «Bada bidea : Independentzia, sozialismoa eta feminismoaren bidean, beti Aitzina!».

Aitzinaren ekintza Altsasuko gazteekin elkartasunez, Espainiaren Baionako kontsulatuan. ISABELLE MIQUELESTORENA

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Etxerat-ek antolatutako mobilizazio bat, Donostian. ©JAGOBA MANTEROLA / FOKU

Salbuespena desmuntatzen hasi den urtea

Iosu Alberdi

Euskal presoen %68,5 Euskal Herriko espetxeetan daude, eta gradu progresioak jasotzen hasi dira. Foro Sozialak uste du azken urtean «aurrerapauso sendoak» eman direla

Iñaki Larramendi: belaunaldi baten azkena

Iñaki Larramendi: belaunaldi baten azkena

Julen Aperribai

Txillardegi, Albisu, Gantzarain, Benito del Valle eta beste zenbaitekin batera Ekinen sortzaile izandakoa hil da, 93 urterekin. EGIrekin erabat hautsi, eta ETAren eratze batzarra egin zuen belaunaldi hark, 1958an.

 ©RAUL BOGAJO / @FOKU

«Gure ereduaren oinarrietako bat da printzipio komunitarioa»

Iosu Alberdi

Urtebete igaro da Espainiako Gobernuak Arabako, Bizkaiko eta Gipuzkoako kartzelen kontrola Eusko Jaurlaritzaren esku utzi zuenetik. Estrategia berria fintzen ari diren arduradun nagusietako bat da Artetxe.
Erraldoiak San Fermin Txiki jaien txupinazoan, iragan ostiralean. ©Iñigo Uriz / FOKU

Iruñeko Udalak laguntza kendu dio Alde Zaharreko jai batzordeari

Berria

San Fermin Txiki jaietan egindako euskal presoen eskubideen aldeko ekitaldi bat erabili du argudio moduan. Jai batzordeak, hortaz, itzuli egin beharko du jasotako dirua. 5.791 euroko laguntza esleitu zion udalak.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...