Larrialdi zerbitzuek atzoko 17:00 aldera jaso zuten deia, arrantzale bat desagertu zela Ispasterko Ogeia hondartzaren inguruan (Bizkaia), harkaitzetan arrantzan ari zela. Eusko Jaurlaritzako Segurtasun Sailak jakinarazi duenez, gaur arratsaldean onik agertu da 56 urteko gizona.
Itsas Salbamenduak, Gurutze Gorriak, Ertzaintzak eta suhiltzaileek atzo iluntzean bilaketa lanak eten zituzten, eta gaur goizean goiz hasi dituzte berriro. Segurtasun Sailak esan duenez, arrantzalea bere kabuz hurbildu zaie erreskate taldeei, eta, anbulantzia batean osasun egoera onean zegoela egiaztatu ondoren, senideekin itzuli da etxera.
