Beste bi astez egongo da itxita Nafarroa, eta beste bi astez pertsianak jaitsita izango ditu ostalaritzak. Taberna eta jatetxeen itxierari aurre egiteko, Nafarroako Gobernuak 10 milioi euroko laguntza iragarri zuen Nafarroako Gobernuak, eta, gaur, Manu Aierdi Garapen Ekonomikoko kontseilariak adierazi du neurri gehiago hartzea aztertzen ari direla.
Eguerdian bildu da Aierdi sektoreko ordezkariekin. Bileraren ostean, gobernuak jakinarazi du beste hamabost egunez luzatuko dutela erkidegoaren itxiera eta iragan urriaren 22an indarrean sartu ziren neurriak. Dena den, elikagaiak etxera eramateko zerbitzua malgutu egingo da gauean, eta 22:30era arte luzatzeko aukera izango da.
«Kolpe gogorra»
Ana Beriain Nafarroako Ostalaritza Elkarteko presidenteak ontzat jo du mahai teknikoa osatzea, baina onartu du itxiera beste bi astez luzatzea «kolpe gogorra» dela. Beriainen ustez, albiste on bakarra da mahai hori egotea, sektoreak «lehen eskuko informazioa» jasoko duelako noiz ireki dezaketen eta zer baldintzatan. Espero du bi asteok gehiago ez luzatzea: «Elkarrizketa garrantzitsua da gauzak ondo egin ahal izateko».
Ostalaritzako ordezkariaren ustez, sektoreak kontrol neurriak hartzen ditu eta ez da agerraldirik ostalaritzan, baina onartu du kaleko mugikortasun handiago sustatu dezakeela. «Ea datozen hamalau egunetan datuak hobetzen diren». Beriaini galdetu diote ea etxean konfinamendua ezartzeko arriskua dagoen: «Hamalau egun barru, bi jokaleku egongo dira: batetik, pixkanaka irekitzea, eta ez dago baztertuta aukera hori; edo, bestetik, etxeko konfinamendua, eta, hala balitz, ikusi beharko genuke zer egin sektoreak euts diezaion ireki arte. Gobernuak esan digu egoera aztertzen ari direla».
