Bidenen eta Trumpen arteko lehia uste baino estuagoa da

Duela lau urte Hillary Rodham Clinton zegoen egoeran dago orain Joe Biden. Inkesta ia guztiak demokraten alde bazeuden ere, orduek aurrera egin ahala, balantza Trumpen alde jarri zen. Gaurkoan ere, lekua hartuz joan da Donald Trump, uste baino lehia estuagoa da, eta dena dago irekita. Trumpek beharrezkoa zuen Florida, eta, estatu horretan aurretik jarri denetik, gauak luze joko duela erakutsi du. Lehia erabakita geratu den azken bi estatuetan, berriz,, Mainen eta Arizonan, Bidenen aldekoak izan dira, baina garaipena Trumpek dauka eskura, aurretik baitoa oraindik zintzilik geratzen diren zazpi estatuetatik seitan.

Trumpentzat ezinbestekotzat jotzen zuten Florida, eta, orokorrean, inkestek emandakoak baino emaitza hobeak lortu ditu estatu ia guztietan. Floridan ez ezik, Texasen ere garaipen handia lortu du —Kaliforniaren atzetik ordezkari gehien dituen estatua da—, bai eta Ohion ere. Hango hemezortzi ordezkariak ere Trumpenak dira, 2016ko garaipena berrituz. Ohio estatu txikia da, baina 1964tik han irabazten duenak eskuratu du presidentetza. Estatu aldakor gehienetan, berriz, irabazteko aukerarik ez du galdu. Presidenteak erakutsi du lehia ez duela galdu (erreparatu emaitzei zuzenean).

Pennsylvania, Wisconsin eta Michiganek dute giltza

Floridako eta Ohioko emaitzak eskuan, gainerako estatu aldakorretan dago giltza, batez ere Pennsylvanian, Wisconsinen eta Michiganen: litekeena da, gainera, ez jakitea nor izango den garaile Pennsylvanian zer gertatuko den argitu arte, eta hori egun batzuk barru izan daiteke. Izan ere, 350.000 herritarrek eman dute botoa aurrez, eta horietatik 75.000 soilik kontatuko dituzte gaur. Duela lau urte, Trumpek irabazi zuen, aurreikuspenen kontra, 44.000 botoren aldearekin. Pennsylvanian bezala, Wisconsinen eta Michiganen ere porrot egin zuen Rodham Clintonek duela lau urte, eta hark galdutako botoak berreskuratuko zituela uste zuen Bidenek, baina, itxuraz, maldan gora jarri zaizkio hiru estatu horiek.

Ipar Carolina eta Minnesota estatu aldakorrak ere interesgune bereziak dira. Ipar Carolinan eta Minnesotan, Trumpek hartu du aurrea, eta aukera asko dauzka irabazteko. Nevada demokrataren alde doa, baina estatu horretako konpromisarioen botoak baino gehiago beharko ditu Bidenek presidente izateko; Nevadan ez ezik, beste bi estatutan ere emaitza irauli eta irabazi egin beharko du.

Estatu horiez gainera, Texasen eta Georgian gertatutakoa ere gertutik aztertu beharrekoa da. Texas errepublikanoen lurraldea da, eta demokratek beren alde jarriko zen esperantza zuten, inkestak kontuan hartuta, baina Trumpen esku geratu da azkenean. Georgian, berriz, atzeratu egin dute kontaketa, hainbat arazo izan direlako posta bidez iritsitako botoekin.

Alaska, Nevada, Wisconsin, Michigan, Pennsylvania, Georgia eta Ipar Carolina estatuetako kontaketa falta da: 86 ordezkari banatzen dituzte horien guztien artean.