Bi egun barru zen hastekoa aurtengo Literaktum jaialdia, ostiralean, hilaren 21era bitarte. Baina COVID-19aren ondorioz erakunde publikoak hartzen ari diren neurriek berriz ipini dituzte ezbaian kultur programazioak, eta, hala, Donostia Kulturak erabaki du hiriko literatur topaketarik nabarmenena ere oraingoz bertan behera uztea. "2021ean bueltatzeko asmo sendoa" iragarri dute arduradunek erabakiaren berri emateko oharrean.
Lehendik iragarritako bi erakusketari eta haurrentzako zenbait ekitaldiri eustea erabaki du, hala ere, antolakuntzak. Barkamena eskatu du jaialdia hasi baino bi egun lehenago hartutako erabakiak sor ditzakeen eragozpenengatik, eta datozen urteetan egitasmoa "indartzeko asmoa" berretsi du.
