Urriaren 18an egin zituzten Bolivian hauteskundeak, eta argi gailendu zen MAS Sozialismorako Mugimendua, urtebeteren ostean agintera itzuliz. Emaitzak jakin ondoren, Evo Moralesek iragarri zuen Boliviara itzultzeko asmoa zuela: «Denbora kontua da», adierazi zuen. Bada, iritsi da ordua, eta presidente izandakoa itzuli eginda herrialdera. Eguerdi partean gurutzatu du muga, eta ehunka herritarrek eman diote ongietorria Villazon (Bolivia) herrian.
Los primeros pasos de Evo Morales Ayma en suelo boliviano, en el Municipio de Villazón, dónde una multitud de ciudadanos se concentraron para esperarlo. pic.twitter.com/xxtEJpfILJ
— Radio Kawsachun Coca (@KawsachunCoca) November 9, 2020
«Gaur egun garrantzitsua da nire bizitzan; pozez betetzen nau hainbeste maite dudan nire aberrira itzultzeak». Adierazi du Boliviako presidente ohiak, bere Twitter kontuaren bidez.
Hoy es un día importante en mi vida, volver a mi patria que tanto quiero me llena de alegría. pic.twitter.com/BFaUzRGJiu
— Evo Morales Ayma (@evoespueblo) November 9, 2020
Argentinan zegoen goizean Morales, La Quiacan, Boliviarekin muga egiten duen herrian. Han elkartu zen atzo Alberto Fernandez Argentinako presidentearekin. Moralesekin batera daude Alvaro Garcia Linera presidenteorde ohia eta NBEko Boliviako enbaxadore ohi Sacha Llorenti ere; ehunka herritar bildu ziren atzo La Quiacan Moralesi ongi etorria emateko. Boliviara itzulitakoan, presidente ohiak bira bati ekingo dio herrialdean barrena.
Hain justu, atzo hartu zuen presidente kargua Luis Arcek, La Pazen eginiko inbestidura saioan. Hainbat lider eta nazioarteko ordezkaria izan ziren bertan. Arcek gogor jo zuen Jeanine Añez jarduneko presidentearen gobernuaren aurka, eta «demokrazia zapaltzea» egotzi zion. Baita «heriotza, beldurra eta diskriminazioa» ereitea eta MASeko politikariei eta sindikalistei jazartzea ere.
«Gure historiaren aro berri bati ekin diogu», adierazi zuen presidenteak, eta jakinarazi denentzat gobernatu eta aberria «berreraiki» nahi duela.
