Gaur goizean, 06:30ak aldera, auto batek autobus bat jo du AP-1eko 109. kilometroan, Arratzua-Ubarrundian (Araba), Gasteizko noranzkoan, eta gizon bat hil egin da. Ertzaintzak jakinarazi duenez, behe laino trinkoaren ondorioz gertatu da istripua, Isuskitza eta Lukuko tunelen artean. Ertzaintza istripu larriaren arrazoiak ikertzen ari da oraindik. 42 urte zituen hildakoak.
Istripua izan den tokira bertaratu dira larrialdi zerbitzuak, tartean Gasteizko eta Zubillagako suhiltzaileak. Eusko Jaurlaritzako Segurtasun Sailak eman duen informazioaren arabera, mikrobusean zihoazen bidaiariak ez dira zauritu.
Istripuaren ondorioz, AP-1 autobideko Isuskitza eta Lukuko tunelen arteko zatia itxita geratu da Gasteizko noranzkoan, eta zirkulazioa Eskoriatzako (Gipuzkoa) lehen irteeratik desbideratzen ari dira.