Ehunka lagunek egin dute gaur goizean Sestaoko Kasko plazaren eta Barakaldoko Herriko Plazaren arteko ibilbidea, ITP Castings enpresan (lehen PCB) iragarritako kaleratzeak salatzeko.
Hasiera batean, 505 langileetatik 136 bota nahi zituen ITPk, aeronautikaren eskariaren amiltzea argudiatuta, baina azken aste honetako bilera batean kaleratzeak 88ra murriztea eta hamar langileri erretiro aurreratua ematea proposatu du zuzendaritzak.
Kaleratze bakar bat ez dutela onartuko erantzun dute sindikatuek, eta ITPk baduela nahiko gihar krisiari aurre egiteko hain neurri dramatikoak hartu gabe.
Hilaren 24ean amaituko da enpresako zuzendaritzak aurkeztutako erregulazio espedientea negoziatzeko epea. Azken asteko negoziazioetatik askorik ez dutela espero azaldu dute langileek, manifestazioaren amaieran irakurritako agiri batean. Edonola ere, negoziazioa amaitzen denean ere borrokan jarraituko dutela agindu dute. «Ez dugu onartuko erregulazioak eragindako familien suntsiketa». Esan dute «ahal duten lekuan» borrokatuko direla kaleratze guztiei aurre egiteko, eta Ezkerraldeko herritarren babesa eskertu dute.