Hegazkigintza

ITP Aero Castingsen ez da akordiorik egon, eta 136 izan daitezke kaleratzeak

Zuzendaritzaren eta sindikatuen arteko negoziazio epeak ez du fruiturik eman, eta orain enpresari dagokio erabakitzea lan erregulazioa bere osotasunean gauzatuko duen ala ez

PCB ITP Aero Castingseko langileak, iragan larunbatean eginiko manifestazioan.
PCB ITP Aero Castingseko langileak, iragan larunbatean eginiko manifestazioan. Aritz Loiola / FOKU Tamaina handiagoan ikusi

Imanol Magro Eizmendi -

2020ko abenduak 23

Precision Castings Bilbaoren (PCB) erregulazio espedienteko negoziazio epea enpresa eta langile batzordeko kideen arteko akordiorik gabe bukatu da. Gauzak hala, eta ITP Aeroren barnean dagoen enpresako zuzendaritzak esanikoa betetzen badu, 136 langile kaleratuko ditu. Negoziazio epean 77raino jaitsi zuen kopuru hori, 11 erretiro aurreraturi eta aldi baterako erregulazio gogor bati lotuta. Horretarako, baina, langile batzordeak akordioa sinatu behar zuen, eta ez du sinatu. Sindikatu bakar batek ere ez du onartu. Enpresak, orain, hamabost egun ditu kaleratzeen berri emateko, eta ikusi beharko da erregulazioa bere osotasunean gauzatzen duten. Langile batzordea prest dago neurria epaitegietara eramateko. 

Ezkerraldeko industriak bizkarreko handia jaso dezake orain. 505 langilek dihardute egun PCB Sestaon eta Barakaldon dituen plantetan (Bizkaia) eta laurden batek baino gehiagok bere lanpostua gal dezake aurki. Horiei urtarriletik hona kalean geldituriko behin-behineko 120 langileak gehitu behar zaizkie, enpresak ez baitzien kontratua berritu. Sindikatuak oso haserre irten dira enpresarekin izandako azken bileratik, eta protestan jarraituko dutela aurreratu dute. Hasteko, beste hiru greba egun egingo dituzte Gabonetako zubiaren ondoren.

Langile batzordeko kideek esana zuten ez zutela kaleratzerik onartuko, eta jarrera horri eutsi diote azken egunera arte. Bilera EHUk Leioako campusean duen eraikin batean izan da, kanpoan protesta egiten ari ziren langileen zarata ozenaren soinu bandarekin. Enpresako zuzendaritzak azken astean egindako eskaintza mantendu du: 77 kaleratze, 11 erretiro aurreratu, eta bi urterako aldi baterako erregulazio espedientea lantalde guztiarentzat: %25ekoa 2021ean; eta %20koa 2022an. Bere kalkuluen arabera, ekoizpena erdira jaitsiko da hurrengo urtean.

Sindikatuek badakite garai txarrak direla hegazkingintzarentzat, baina krisi koiunturala dela sinetsita daude, eta enpresaren iragarpenak ezkorregiak direla iritzi diote. Gauzak hala, bi eskaintza berri egin dituzte azken egunean: ELAk eta LABek aldi baterako erregulazio luze batean oinarriturikoa; CCOOk eta UGTk, aldiz, aurreraturiko erretiro batzuk eta irteera boluntarioen aukera gehitu dizkiote ekuazioari. Enpresak, baina, entzungor egin die biei, eta horrekin bukatu da bilera. PCBk, orain, hamabost egun ditu argitzeko zer egingo duen eta ea 136 kaleratze egiteko asmoari eutsiko dion.

Sindikatuek neurria epaitegietara eramateko asmoa dute, eta indartsu sentitzen dira, gainera. Iragan irailean beste epaiketa bat irabazi zuten, epaileak legez kanpokotzat jo baitzuen PCBk eginiko aldi baterako erregulazioa. Enpresaren egoera ekonomikoa ikusita horrelako neurri bat hartzeko arrazoirik ez zegoela ebatzi zuen. Izan ere, eta sindikatuek azaldu dutenez, PCBk irabazi handiak izan ditu azken urteetan. Auzi honen korapiloak, gainera, beste hari bat du: Rolls Roycek, ITP Aeroren jabeak, enpresa saldu nahi du, eta barneko plantetako batek horrelako auzibide bat irekia izateak erosleak uxatu ditzake. PCBn hegazkinen turbinetarako piezak egiten dituzte, fundizioa eta guzti dute.
 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Kapitolioko kupula. Kongresua jokaleku inportantea izango du Bidenek. ©M. REYNOLDS / EFE

Tarte mugatua Bidenentzat

Irune Lasa

Ekonomia suspertzeko eta desberdinkeria murrizteko berehalako eta egiturazko neurriak hartu beharko ditu AEBetako administrazio berriak. Bizkor ibili beharko du.

Merkataritzan, atzera-bueltarik ez

I.L.

Donald Trumpek bere muga zergekin piztutako gerrak apaldu egingo dira, ziurrenez, Bidenen administrazioarekin, baina horrek ez du esan nahi harremanak aurreko egoerara itzuliko direnik.
 ©MARISOL RAMIREZ / FOKU

«Funtsetarako lehia proiektuena izatea espero dut, Europak esaten duen bezala»

Irune Lasa

Espainiako Gobernuak Europako funtsen banaketaz argibide gehiago ematea nahiko luke Azpiazuk. 2021ak zerga erreformaz gogoeta egiteko urtea izan behar duela uste du.
Pertsona bat, goi tentsioko linea baten ondoan. ©ELISEO TRIGO / EFE

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna