Gasteizen pobrezia energetikoa gero eta hedatuago dagoela salatu du Gasteizko Inor Ez Etxerik Gabe ekinbideak: pandemiak areagotu egin du “argia edo berogailua pizten ez” duten familien kopurua, haien hitzetan. Hori salatu dute gaur goizean Andre Maria Zuriaren plazan, Gabonetako bola handiaren alboan, Itzali azpijokoak, piztu eskubideak lelopean egindako elkarretaratzean. “Etxe guztietan argia, gasa eta oinarrizko hornidura guztiak izateko eskubidea” aldarrikatu dute.
Elkarretaratzerako aukeratutako tokia ez da ausazkoa izan: Gasteizko Udalak Eguberrietako argietara bideratutako diru kopurua kritikatu dute. Udalak aurrekontuetan hitzemandakoa baino 40.000 euro gehiago ordaintzea gaitzetsi dute, lehenengo eskaintzan enpresa bat ere ez baitzen aurkeztu: “Beste behin ere, udalari ez zaio asko kostatu enpresen aginduei kasu egitea; ez da berdina gertatzen eskubideak aldarrikatzen ditugunean”. Era berean, enpresa energetiko handiek “bizilagunen zorpetzea handitzearen kontura” irabaziak lortzen jarraitzen dutela ere salatu dute.
Hori horrela, etxe guztietarako oinarrizko hornidurak aldarrikatu dituzte: alarma egoera dagoen bitartean energia enpresek argia moztu ezin badute ere, iritzi diote neurri hori ez dela nahikoa. “Guk gaur eta beti gure etxeetan energia izateko eskubidea aldarrikatzen dugu”.
