Berriz ere, kalera atera dira Osakidetzako langileak. Satse, ELA, LAB, CCOO, UGT eta ESK sindikatuek deituta, elkarretaratzeak egin dituzte Arabako, Bizkaiko eta Gipuzkoako hainbat ospitaleren eta osasun etxeren atarietan. Helburu argia izan dute: osasun sistema publikoaren egoera salatzea, eta Osakidetzarako langile gehiago kontratatzeko beharra azpimarratzea.
Hain zuzen «egiturazko arazoak» salatzeko bildu dira Bilboko Deustu auzoko osasun etxean, Donostia ospitalean eta Gasteizko Santiago ospitalean. «Osakidetzaren egoera ez da hobetzen, eta ez dituzte arazoak konpontzen», salatu du Satse sindikatuaren ordezkari Amaia Mayorrek.
Mayorrek aipatu du atzo sindikatuek Eusko Jaurlaritzako Osasun sailburu Gotzone Sagarduirekin izandako bilera. Haren hitzetan, Sagarduik «hitz onak» izan zituen, eta «etorkizunera begira negoziatzeko asmoa» erakutsi zuen. Baina konponbide azkarragoa eskatu du Mayorrek: «Osakidetzak orain behar ditu konponbideak, eta horregatik jarraitzen dugu mobilizazioekin».
Txertoa hizpide
Koronabirusaren aurkako txertoa jartzen hasi berri direnean, Mayorren irudiko, langile kopurua negoziatu behar dute, baita haiek egonkortu eta langileak areagotu ere. Eusko Jaurlaritzako Osasun Sailaren joera salatu du: «Osasun Sailak ez du planteatzen langileen esfortzua zukutzeaz haragoko neurririk». Ohartarazi du, arazoak konpondu ezean, mobilizazioekin eta urtarrilaren 28rako deituta duten grebarekin jarraituko dutela.
