Bidaxuneko (Nafarroa Beherea) bi haztegitan agertu da hegaztien gripea, tartean Lataille familiaren negozioa. Han, kriaxera arrazako ahateak hazten dituzte, eta inguruko haztegiak hornitzen dituzte. Euskal Elkargoak baieztatu du berria, baina lasaitasun mezua igorri du. Gaixotasuna «modu murriztuan eta klinikoki kontrolatzeko moduan» agertu dela azpimarratu du.
Osasun krisiari aurre egiteko proiektu pilotu bat iragarri du Elkargoak, Nekazaritza Ganberaren eta ELB sindikatuaren laguntzarekin, eta espero du horrekin kontrolatu ahal izango dutela agerraldia. Hegaztiak ez dituzte hilko, eta hamabost eguneko berrogeialdia emango diete, kriaxera arrazak gaixotasunarekiko duen erresistentzia neurtzeko. 2017ko krisian frogatu zen arraza hori gaixotasunarekiko bereziki erresistentea zela.
Urtarril hasieran jakinarazi ziren hegazti gripearen lehen kasuan Euskal Herriko mugan, Landetan eta Biarnon. Pirinio Atlantikoetako departamenduko prefeturak departamenduko 159 herri jarri zituen kontrolpeko eremuan.
