Abuztuan, Eusko Jaurlaritzako Industria Sailak Zubietako erraustegiari abian jartzeko eman zion behin-behineko baimena iraungi zenean, agerian geratu ziren Zubietako erraustegiaren lege egoeraren inguruko hainbat zalantza. Besteak beste, irailean hondatu egin zen instalazioaren transformadore nagusia, eta ordezko batzuekin jardun du funtzionatzen hainbat hilabetez. Horrez gain, GuraSOS elkarteak salatu zuen labeak homologatu gabe zeudela, eta erraustegia argindar ekoizleen erregistroan erregistratu gabe zegoela. Egoera hori guztia argitzeko, fiskalizazioari eta lege egoerari buruzko txosten bana nahi zituzten EH Bilduk eta Elkarrekin Podemosek GHKri. Hain zuzen ere, bi horiek eskatzea galdegin diote gaur herrialdeko Batzar Nagusiek, baina haien proposamenak ez du aurrera egin, EAJk, PSE-EEk eta PPk kontra bozkatu dutelako.
EH Bilduko batzarkide Ainhoa Intxaurrandietak salatu du diputazioak oraindik ez duela erakutsi erraustegiaren jarduera legezkoa dela bermatzen duen txosten juridikoa. Abenduan martxan jarri zuen kontratua GHK-k erraustegia kudeatzen duen Ekondakin enpresarekin, eta ordaintzen hasi zaizkio hilabetero, nahiz eta GuraSOS elkarteak salatu zuen oraindik probetan dabilela eta beharrezko baimen guztiak ez dituela indarrean —besteak beste, Jaurlaritzako Industria Sailarenak—.
