Eusko Jaurlaritzak beste bultzada bat eman nahi dio Finkatuz funtsari, zeinaren xedea den enpresa handien akzio edota zorrak erostea, haiek «hemen errotuta jarraituko dutela eta euskal produkzio ehun osoan trakzio izaera izango dutela bermatzeko». 2019ko uztailean sortu zen funtsa, eta soilik bi erosketa operazio egin ditu bitarte honetan: CAF tren egilearen akzioen %1,24 erosi zizkion Kutxabanki, eta Kaiku elikadura enpresaren %7,3 Ekarpen funtsari.
Besteak beste Euskaltelekin gertatutakoaren harira, badirudi Eusko Jaurlaritzak berriz heldu nahi diela enpresa estrategikoak errotzeko mugimenduei, eta horretarako Finkatuz erabili nahi duela. Adibidez, orain, ITP Aero salgai eta Aernnovak hura erosteko aukera mahai gainean dagoen honetan, Pedro Azpiazu Ekonomia eta Ogasun sailburuak «arrazoizkotzat» jo zuen operazio horretan Finkatuz-ek ITP Aeroren partaidetza bat erostea, aeronautika enpresaren jarduera Euskal Herrian errotzen laguntzeko.
Irizpideak
Bultzada berri horren barruan, gaurko Gobernu Kontseiluan Eusko Jaurlaritzak baimena eman dio Euskal Finantzen Institutuari sozietate publiko bat eratzeko, Finkatze Kapitala Finkatuz izenekoa. Haren lana izango da Finkatuz funtsa kudeatzea, hasieran 160 milioi euroko kapital soziala duela. Asmoa da legealdian funtsa 300 milioi euroraino handitzea.
Erosketetarako irizpideak ere ezarri dira. Horrela, krisian dauden enpresak baztertu egingo dira. 100 milioi eurotik gorako fakturazioa eta gutxienez 50 langile dituzten enpresak hartuko dira aintzat partaidetzarako, betiere egoitza soziala «Euskadin» duten sozietate edo kooperatibak badira, eta ez badira talde bateko kide.
Sektore batzuk lehenetsiko dira, nahiz eta zerrenda ez den itxia, Jaurlaritzaren arabera: aeronautika, elikadura, automobilgintza, biozientziak, eduki digitalak, ekoindustriak, energia, makinak, produktu eta instalazio siderurgikoa, teknologia elektroniko eta informaziokoak, eta garraioak, mugikortasuna eta logistika.
