Albistea entzun

Gernikako bonbardatzea

Faxismoaren kontrako aldarriak areagotu egin dira bonbardaketaren urteurrenean

84 urte bete dira faxistek Gernika bonbardatu zutenetik; gaur arratsaldean egingo dituzte ekitaldi nagusiak

Ikurrinak Gernikako balkoietan, urteurrenaren iazko ekitaldian.
Ikurrinak Gernikako balkoietan, urteurrenaren iazko ekitaldian. Aritz Loiola - Foku Tamaina handiagoan ikusi

Gotzon Hermosilla -

2021eko apirilak 26

Gernika bonbardatu zutenetik 84 urte bete dira gaur, eta, gaurkotasun politikoak aginduta, eragile askok aukera baliatu dute faxismoaren arriskuaz ohartarazteko. EH Bilduk, koordinatzaile nagusi Arnaldo Otegiren bidez, nabarmendu du faxismoaren oinordekoak «hemen» daudela oraindik: «Ez gintuzten makurrarazi; ez gaituzte bezatuko», esan du sare sozialetan hedatutako mezu baten bidez. EH Bilduko legebiltzarkide Maddalen Iriartek esan du «faxismoari aurre egitea» beharrezkoa dela «gaur orduan bezala».

EH Bilduk jakinarazi du Gorka Elejabarrieta senatariak galdera egingo diola Espainiako Gobernuko presidenteorde Carmen Calvori: ea Espainiako Gobernuak onartuko ote duen «gobernu frankistak Gernikako bonbardatzean izandako erantzukizuna».

Sabino Arana fundazioak bonbardaketari buruzko artikulu bat paratu du bere webgunean. Hor, fundazioak gogora ekarri du frankismoak beti uko egin ziola sarraskian izandako ardura onartzeari. «Hasieran, bonbardaketa estrategikotzat definitu zuten, bazirudielako haren helburu bakarra zela gudarien batailoiei Bermeorantz joatea galaraztea. Baina haren ezaugarriek eta erabilitako basakeriak frogatu zuten hura gerra esperimentu bat izan zela».

PSE-EEko idazkari nagusi Idoia Mendiak Vox alderdia izan du gogoan, aipatu ez badu ere, eta esan du Gernikako bonbardaketak «askatasunen kontra altxatutako faxismoaren alderik makurrena» erakusten duela. Gaia gaur egungo egoerara ekarrita, deitoratu du oraindik ere «ideologia horretatik gatazka» bultzatu nahi dutela, eta horri «demokrazia, elkarrizketa eta akordioak» kontrajarri dizkio.

Ekitaldia Gernikan

Ekitaldi nagusia 16:30ean izan da, bonbardaketa hasi zen orduan hain zuzen. Lore eskaintza eta ohorezko aurreskua egin dituzte Zalloko hilerrian, Eusko Jaurlaritzako lehendakari Iñigo Urkullu eta Gernika-Lumoko alkate Jose Maria Gorroño buru zirela. Urkulluk esan du bonbardatze hura «herritarren kontra planifikatuta» egon zela, «ideologia nagusi bat zuen herri bat zigortzeko asmoz».

Urkulluren ustez, bonbardatzearen «aztarnak» iraun egin du, «belaunaldi hartan eta ondoko belaunaldietan ere». Aztarna ez ezik, «ureztatu eta elikatu beharreko hazia» ere bada Gernikaren gomuta Urkulluren aburuz, «herri eta pertsona guztien arteko bizikidetza lortzeko».

Gernika Batzordea

Gaur 45 urte bete dira Gernika Batzordeak bere lehen adierazpen publikoa egin zuenetik. Hori dela eta, urrian aurkeztuko duten ikus-entzunezko lan bat prestatzen dabiltza, batzordearen ibilbidea laburbilduko duena. Orain, horren aurrerapena plazaratu dute.

https://guernicagernikara.eus/ekitaldiak/gernika-batzordearen-aurrerapen-bideoa-1976-2021/#bideoa

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Iñigo Urkullu Eusko Jaurlaritzako lehendakaria, Labiren bileran. / ©Jon Usual, EFE

Jaurlaritzak helegitea aurkeztuko dio EAEko Auzitegi Nagusiaren erabakiari

Paulo Ostolaza - Jon Ordoñez Garmendia

Goizean epaileek ebatzi dute Jaurlaritzak ez duela eskumenik herritarren joan-etorriak mugatzeko behin alarma egoeraren legea indargabetu eta gero. Etxeratze agindua ezartzeko modurik ez duela ere zehaztu du, eta bilkurak lau lagunetara mugatzeko debekua ere atzera bota du.

Fatna Chachai. ©Nafarroako Hitza

«Behartsuenei laguntzeko garaia ere bada ramadana»

Uxue Rey Gorraiz - Nafarroako Hitza

Apiriletik, ramadanean murgilduak dira hainbat herritar. Bigarrenez, birusak oztopatu egin ditu haren parte diren zenbait ospakizun. Elkartasunak, ordea, ez du indarra galdu, Chachairen ustez.

Iñigo Urkullu Eusko Jaurlaritzako lehendakaria, Labiren bileran, gaur. / ©Jon Usual, EFE

Eusko Jaurlaritzak onartu egin du EAEko Auzitegi Nagusiaren erabakia

Jon Ordoñez Garmendia - Paulo Ostolaza

Igandean libre izango da Hego Euskal Herrian mugitzea. Ostalaritzak 22:00ak arte irekita egon ahalko du Araban, Bizkaian eta Gipuzkoan, eta Jaurlaritzak indargabetu egin ditu joko aretoei eta barneko kirol jarduerei zegozkien debekuak ere. Neurriak igandean jarriko dituzte indarrean.

Tabernek aukera izanen dute 22:00ak arte irekitzeko. Irudian, Iruñeko taberna bat. ©IÑIGO URIZ / FOKU

Zer aldatuko da igandetik aurrera?

Ion Orzaiz

Euskal Herria banatzen duten hiru eremu administratiboetan bide orri propioak ezarri dituzte, neurri murriztaileen arintzea kudeatzeko.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna