Gutxienez 44 pertsona hil dira eta 150 inguru zauritu Israelgo ipar-ekialdean gauean egin den erlijio ekitaldi batean. Meron mendiaren magalean milaka pertsona baturik zeuden, Lag B'Omer jaialdirako, eta jende pilaketa bat gertatu da.
Dozenaka mila pertsona zeuden jaialdian, Israelen izurria hasi zenetik herrialdean eginiko ekitaldirik jendetsuenean. Poliziaren arabera, ezbeharra hasi zen handik irteteko ahaleginean erromes batzuek irrist egin zutenean eskailera batzuetan. Horrek eragin zuen beste asko ere erortzea, eta jendetzak zapaltzea.
#BREAKING
— The A&O Board PSF (@AOBPSF) April 29, 2021
ALERT: At least 37 people have been killed and dozens critically injured at a mass stampede during Lag B’Omer celebrations in Mount Meron, #Israel
The death toll is expected to rise.pic.twitter.com/TSWTmGfUwE
Agintariek 10.000 lagunen bilkura zuten baimendua, baina, antolatzaileen arabera, 650 autobus baino gehiago heldu ziren herrialde osotik, eta erromesak 30.000tik gora zirela uste dute. Zenbait iturriren arabera, 100.000ra ere heldu zitezkeen.
Breaking: At least 28 dead, 100+ injured, after a platform collapsed at a festival in Meron, Israel. pic.twitter.com/fTmH4pPhTd
— PM Breaking News (@PMBreakingNews) April 29, 2021
«Hondamendi handia» izan dela adierazi du Benjamin Netanyahu lehen ministroak.
Txertaketa kanpaina handia egin du Israelek, eta kutsatze datu onak lortu ditu. Horregatik, azken egunetan, asko arindu dituzte izurriari aurre egiteko neurriak. Edonola ere, Poliziak esan du ezin izan dutela osasun neurririk hartu jaialdian, jendetza oso handia zelako.
Judu ortodoxoek urtero egiten dute erromesaldia Meron mendira. Han dago Shimon Bar Yochai errebinoaren hilobia, eta lekua juduen leku sakratuenetako bat da. Suak pizten dute gauean, eta dantza eta otoitz egiten dute jaialdian.
