Zinema
Zinemazale Berriak programak euskarazko pelikulak emango ditu, merkeago
Euskadiko Zinema Aretoen Elkarteak eta Eusko Jaurlaritzak antolatu dute egitasmoa, eta helburua da ikusle berriak joatea aretoetara. Hamabi pelikula ikusi ahalko dira Arabako, Bizkaiko eta Gipuzkoako hemezortzi aretotan, asteburu goizetan, 2,90 euroan.
Zinema aretoetara publiko berria erakartzeko helburuarekin, EZAE Euskadiko Zinema Aretoen Elkarteak Zinemazale Berriak programa antolatu du, Eusko Jaurlaritzako Kultura eta Hizkuntza Politika sailaren laguntzarekin. Maiatzaren 23tik azaroaren 14ra bitarte, hamabi film proiektatuko dituzte Arabako, Bizkaiko eta Gipuzkoako hemezortzi zinema aretotan. Euskarazko ekoizpenak eskainiko dituzte: hamabi proposamenak Zinema Euskaraz programaren barruan daude, estreinaldiak euskaratzea bultzatzen duen Eusko Jaurlaritzaren egitasmoa. Asteburu goizetan emango dituzte filmok, eta sarrerak 2,90 euroan egongo dira.
2020. urtea «konpentsatzeko» sortu dute ekinbidea, antolatzaileek adierazi dutenez. Iaz, hiru lurralde historikoetako zinema aretoek 10 milioi euroko galerak izan zituzten, 2019ko datuekin alderatuta, eta %65 ikusle gutxiago joan ziren.
Lurraldeka, bederatzi aretok parte hartuko dute Gipuzkoan —Principe, Antiguo Berri, Bastero, Villabona, Areria, Zumarraga, Beasain, Zarautz eta Niessen—, zazpik Bizkaian —Multicines Bilbao, Golem, Getxo, Durango, Bermeo, Mungia eta Muskiz— eta bik Araban —Gorbeia eta Florida—. Emanaldiei dagokienez, hau da egutegia, behin-behinean:
2021/05/23 Maya Erlea- Ezti jokoak
2021/05/30 Paddintong 2
2021/06/06 Asterix, edabe magikoaren sekretua
2021/06/13 Nur eta herensugearen tenplua
2021/06/20 Ballerina
2021/10/03 Oin handiaren semea
2021/10/10 Printze Txikia
2021/10/17 Mr Link
2021/10/24 Pokemon Pikachu Detektibea
2021/10/31 Tom eta Jerry
2021/11/07 Elfkins
2021/11/14 Smallfoot
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
