Albistea entzun

Pandemiaren aurkako lege egitasmoan akordioa lortu dute EAJk, PSEk eta EP-IUk

Elkarrekin Podemos-IUk azpimarratu du, akordioari esker, isunen pisua murriztuko dela legean, eta gizarte zibilaren parte hartzea sustatuko dela.

Miren Gorrotxategi eta Iñigo Urkullu, artxibo irudi batean
Miren Gorrotxategi eta Iñigo Urkullu, artxibo irudi batean Jon Rodriguez Bilbao/ Efe Tamaina handiagoan ikusi

Edurne Begiristain -

2021eko ekainak 9

Legealdiko lehen akordio garrantzitsua erdietsi dute EAJk, PSEk eta Elkarrekin Podemos-IUk Eusko Legebiltzarrean: pandemiaren aurkako lege egitasmoan ados jarri dira hiru taldeak. Akordioaren garrantzia azpimarratu dute adostasunera iritsi diren hiru alderdiek, gaur goizean egindako agerraldietan.

Miren Gorrotxategi Elkarrekin Podemos-IU taldeko bozeramaileak azaldu du legea «hobetzea» lortu dutela. Besteak beste, jakinarazi du murriztu egingo direla lege egitasmoak jasota zituen isunak. «Pedagogiaren alde egin behar dugu, ez zigorraren alde», azaldu du. Horrez gain, gizarte zibilaren parte hartzea sustatu egingo da pandemia arautzen duten organoetan; hala nola hezkuntza komunitatea erabakiguneetan egon ahalko da ikastetxeak berriz itxi beharko balira, edo osasun publikoaren defentsarako plataformak parte hartuko du Osakidetza indartzeko erabakitzen den organoetan. Lortutako akordioaren beste gakoetako bat izango da Eusko Jaurlaritzak azalpenak eman beharko dituela aldiro Eusko Legebiltzarrean, osasun egoeraz ez ezik, baita gizartearen eta ekonomiaren egoeraz ere. Halaber, oinarrizko eskubideak «blindatu» egingo dira akordioari esker, eta, beraz, alarma egoeratik kanpo ezin izango dira oinarrizko eskubideak murriztuko dituen neurririk hartu, Gorrotxategik jakinarazi duenez.

EAJk eta PSEk txalotu egin dute Elkarrekin Podemos-IUrekin erdietsitako akordioa. Javier Telleria EAJko legebiltzarkideak azpimarratu du lan eredu «zintzoa, arduratsua eta eraikitzailea» izan dela, eta eskertu egin dio Elkarrekin Podemos-IU alderdiari adierazi duen borondatea. Akordioari esker, legeak «segurtasun juridiko handiagoa» izango duela esan du Telleriak. Bide beretik mintzatu da Ekain Rico PSEko legebiltzarkidea ere, nabarmenduta akordioari esker «tresna eraginkorragoak» egongo direla birusari aurre egiteko.

EH Bildurentzat, ordea, aterki juridiko txikiegia eskaintzen du hiru taldeek legearen inguruan lortutako akordioak, eta koalizioak 72 zuzenketa aurkeztu dizkio lege proposamenari. Helburu bikoitza dute zuzenketek, Maddalen Iriartek eta Rebeka Uberak azaldu dutenez: osasun sistema publikoa «ondo egituratzea» balizko osasun larrialdiei erantzun egokia emateko, eta herritarren zaintza eta babesa bermatzea. Zuzenketen artean, besteak beste, EH Bilduk proposatu du Labi teknikoa indartzea eta guztiz independentea izatea, eta, horrekin batera, Labiren mahai politikoa desagertzea. Ildo horretan, EH Bilduk proposatu du Labik izaera independentea izatea, askotariko alorretako teknikari eta adituek osatuta egotea, eta haren erabakiak publikoak izatea.

 

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Zenbait herritar Iruñeko txertaketa gunean, Nafarroako Unibertsitate Publikoko kiroldegian. ©JESUS DIGES / EFE

Hego Euskal Herriko biztanleen %35ek osatua dute txertaketa pauta

Uxue Rey Gorraiz - Oihana Teyseyre Koskarat

Osakidetza datorren astean hasiko da 40 urtetik beherakoak txertatzen. Hegoaldeko herritarrak Iparraldean txertatzeko irizpideak lauso dira

Euskararen erabilera %7 eta %52 artekoa da EHUko eremu ez-formaletan

Euskararen erabilera %7 eta %52 artekoa da EHUko eremu ez-formaletan

Berria

Soziolinguistika Klusterrak hamazazpi fakultatetan euskara zenbat erabiltzen den behatu du, Euskara Errektoreordetzak eskatuta

Claudia Venceslao eta Luis Maria Salgado, atzo, agerraldian. ©ENDIKA PORTILLO / FOKU

EH Bilduk arau bat ondu du egoitza pribatuetako baldintzak «duintzeko»

Edurne Begiristain

Arabako egoitza zentroak ituntzeko proposamena landu du. Eragile eta sindikatuei aurkeztuko die zirriborroa, irailean erregistratu aurretik

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna