Albistea entzun

Garapen ekonomikoa

Jaurlaritzak landa garapenaren ikuspegia txertatuko du bere politiketan

Landa garapeneko lege proiektu bat onartu du, eta proposatu du Landa Garapenerako Sare berri bat sortzea.

Arabako Mendialdean dago Kanpezu herria
Arabako Mendialdean dago Kanpezu herria Jaizki Fontaneda/Foku Tamaina handiagoan ikusi

Aitor Biain -

2021eko ekainak 29 14:53

Landa eremuak bizirik irautean jarri du arreta Eusko Jaurlaritzak. Herri txikiei eta horietan bizi diren biztanleei eutsi nahi die, eta, ahal dela, hirietatik lekualdatzeko prest dauden herritarrak erakartzen saiatu. Erronka horri erantzuteko, landa garapenaren ikuspegia txertatuko du aurrerantzean bere erabakietan. Horrek esan nahi du administrazioak bultzatuko dituen politiketan landa gunean izan dezaketen inpaktua aztertuko dela ezer erabaki aurretik. Rural proofing deitu diote horri; alegia, genero ikuspegiarekin edo ingurumenarekin egiten den moduan, txosten berezi bat egin beharko da aldiro.

Landa Garapeneko legea berritu du Jaurlaritzak, zeinaren bitartez estrategia berri bat ezarriko duen haren politiketan. 1998koa zen indarrean zegoena, baina Arantxa Tapia Jaurlaritzako Ekonomia Garapeneko sailburuaren hitzetan, aldaketa garrantzitsuak izan dira azken hogei urteetan, eta horiek eragin zuzena izan dute landa eremuarengan, bai eta landa inguruaren eta hiriaren arteko harremanean.

Tapiaren hitzetan, halere, Arabako, Bizkaiko eta Gipuzkoako landa eremuak «ez daude hutsik», eta hori «orekari» eusteko egin den lanaren ondorio da, hein handi batean. Une honetan, EAEko biztanleen %8,3 bizi da landa eremuko herri txikietan, hau da, kilometro karratuko 150 biztanle baino gutxiago dituzten udalerrietan. Sailburuaren arabera, datua ez da hain kezkagarria, esan nahi baitu «XXI.mende hasierako lehen hogei urte hauetan biztanleriari eustea lortu dugula».

Are gehiago, Tapiak nabarmendu du pandemia iritsi zenetik hainbat herrietako erroldetan «igoera oso nabarmena» izan dela, nahiz eta oraindik goiz den jakiteko egoerak baldintzatutakoa den edo egonkortzeko joera izango duen. Araban eman da aldaketa hori, batez ere: Mendialdean, esaterako, %7 igo da biztanle kopurua azken urtean; %2,5 inguru hazi da Añanako eskualdean, eta %3 Gorbeialdean.

Organo berri bat
Hala ere, administrazioak nahi du landa ingurunea bizitzeko leku erakargarri izatea, eta herrialdearen ekonomiaren, gizartearen eta lurraldearen garapenerako eta kohesiorako «funtsezko faktore» izatea. Eta modu horretan, Jaurlaritzak nahi du landa eremuan bizi direnen garapen aukera hirietan dagoenaren maila berekoa izatea, nola bizi kalitateari dagokionez hala ekonomia eta lehiakortasunari dagokionez ere.

Horretarako, egun martxan dauden laguntza programak indartzeaz gain, Euskadiko Landa Garapeneko Sarea sortzea proposatu du. Organo berri hori osatuko lukete, besteak beste, Eusko Jaurlaritzaren, foru aldundien, Eudelen, Arabako Kontzejuen Elkartearen, Kuadrillen, Haziren, Landa Garapenerako Elkartearen, Tokiko Ekintza Taldearen eta lurraldeko eta sektoreko beste erakunde batzuen ordezkariek.

Landa garapenean inplikatutako erakunde eta eragileen arteko lotura, koordinazioa eta lankidetza bultzatzea litzateke helburua. Lege proiektua legebiltzarrean onartuko beharko da orain.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Iñaki Arrizabalaga Europako Batasuneko Funtsen arduradun nagusia Nafarroako Gobernuan eta Elma Saiz Ekonomia eta Ogasun kontseilaria, gaur, Parlamentuan ©Foku

Nafarroako Gobernuak 365 milioi jasoko ditu Europako Batasunetik

Joxerra Senar

Gobernuaren kontrolpean 97 proiektu daudela zehaztu du Elma Saiz Ekonomia eta Ogasun kontseilariak, parlamentuan.

Donostiako Ospitaleko langile batzuk greba egun bateko afixak itsasten. ©Jon Urbe / FOKU

ELA: «Gobernuak legea urratzeko prest daude zerbitzu publikoekin negozioa egiteko»

Imanol Magro Eizmendi

Sindikatuaren kalkuluen arabera, Eusko Jaurlaritzak eta Nafarroako Gobernuak egonkortze prozesuetatik kanpo utziko dituzte behin-behineko langile publikoen hiru laurdenak.

Eguzki panelak Madrilgo etxe baten teilatuan. ©J.J. Guillen / Efe

Eguzki panelak izan beharko dituzte eraikin publiko eta komertzial guztiek 2027rako

Iker Aranburu

EBren RepowerEU planak 2029rako utzi du etxebizitza berri guztietan panelak jartzeko betebeharra. Bizkorrago egin nahi ditu parke eoliko eta fotovoltaikoak.

Milaka lagun bildu dira manifestazioan. ©Raul Bogajo/ FOKU

Sindikatuek giharra erakutsi dute Arabako metaleko lehen greba egunean

Unai Etxenausia

ELA, LAB, CCOO, USO, ESK eta CGT sindikatuek deituta, hiru greba egunetatik lehena dute gaur sektorean. Arrakastatsua izan dela adierazi dute: «historikoa». Datorren asteartean eta ostegunean ere egingo dituzte lanuzteak.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...