Albistea entzun

PIRAGUISMOA

«38 urte dauzkat. Azkarrena ez nintzen izango, baina esperientzia handiena duena, bai»

Maialen Chourrautek falta zitzaion domina lortu du: zilarrezkoa. Lasarte-Oriako piraguista bigarren tokian sailkatu da emakumezkoen eslalomeko K1eko proban. Olinpiar Jokoetan domina gehien irabazi dituen euskal kirolaria da: hiru.

Igor Susaeta -

2021eko uztailak 27 11:02

Olinpiar Jokoen aurreko lehiaketetan, Munduko Kopan eta Europako Txapelketan, dominarik lortu gabe heldu zen Maialen Chourraut (Lasarte-Oria, Gipuzkoa, 1983) Tokiora. «Lehen hamarretan sailkatu naiz hiru lehiaketetan, eta ez naiz egon dominetatik hain urrun. Lehiaketa bakoitza hutsetik hasten da guztiontzat», esan zion BERRIAri joan den astean, lehiatzen hasi aurretik. Eskarmentuaren ahotsa da Chourraut. Domina lortzearekin amets egiten zuen, baina bazekien horretarako helburu bat bete behar zuela: «Maialen azkar bat ikustea». Eta Chourrautek jaitsiera oso azkarra egin du, gaur, emakumezkoen eslalomeko piraguismoko K1 diziplinako finalean, eta, horri esker, zilarrezko domina kolkoratu ahal izan du podiumean. Bere ibilbideko hirugarren domina olinpikoa du, Londresen (2012) brontzea eta Rion (2016) urrea irabazi eta gero. Pekinen, 2008an, 16. izan zen.

Argazki gehiago, Olinpiar Jokoen argazki galerian

Podiumetik jaitsi berritan, BERRIArekin hitz egin du. «38 urte dauzkat. Azkarrena ez nintzen izango, baina esperientzia handia duena, bai», adierazi du Chourrautek. Piraguistak aitortu du «arindua» hartu duela finalerako sailkatu denean. «Oso berezia izaten ari da azken urtea, eta azken olinpiar zikloa, gogorra eta berezia».

Hala, Olinpiar Jokoetan domina gehien irabazi dituen euskal kirolari da. Guy Lapebie txirrindulariak bi domina lortu zituen 1936an Berkinen, Frantziako selekzioarekin: urrea taldekako jazarpenean, eta zilarra errepideko 100 kilometroko lasterketan. Xabier Fernandezek eta Iker Martinezek osatutako bikoteak ere bi kolkoratu zituen Espainiako selekzioarekin, belan: urrea Atenasen (2004), eta zilarra Pekinen (2008).

Finalerdiekin hasi da gaurko eguna Kasaiko ur bizietako barrutian. Chourraut ez da ikusgarri aritu (bi segundoren penalizazioa jarri diote), baina, zazpigarren sailkatuta, finalean sartzea lortu du. Hori bai, sei segundo pasa atera dizkio finalerdiaren garaileak, Jessica Fox australiarrak. Baina kanporaketa batean aurrera egitea da helburua. Bestela, galde diezaiotela Eva Tercelji (Eslovenia). Munduko txapelduna zen faboritoetako bat, baina egindako hutsengatik finaletik kanpo geratu da.

Finalean laugarren tokian atera da Chourraut. 25 ateko ibilbidearen erdialdean susto txiki bat eduki du, baina odol hotzarekin jokatu du, eta aurrera segitu. Ondo bukatu ohi ditu lasterketak, eta, bai, ibilbidearen azkeneko metroetan erakustaldia eman du, eta behin-behinean lehen tokian jarri da Lasarte-Oriakoa, penalizaziorik jasan gabe. Helmuga gurutzatu berritan, kamera finko bati begira jarri, eta, kanporaketan egin bezala, musuak jaurti ditu airera. Ane bere 8 urteko alabaren izena esan du. «Ane!».

Sei piraguista falta ziren oraindik. Emozio handiko minutuak izan dira ondorengoak. Baina piraguista bakar batek lortu du hobetzea euskaldunaren denbora: Ricarda Funk alemaniarrak. Hark kolkoratu du urrea, 105.50eko denbora eginez. Chourrauten denbora 106.63 izan da, eta Fox australiarrarena, hirugarrenarena, 106.73.

Emozioa

Dominaren bat kolkoratuko duela jakin du Chourratek, ateratzen azken-aurrekoak, Eliska Mintalovak (Eslovakia), ez baitu bere denbora hobetu. Zain zeuden piraguistengana jo du kamerak, eta han zegoen Chourraut, 38 urtekoa, Xabier Etxaniz bere entrenatzaile eta senarra besarkatzen, emozioari ezin eutsita.

Domina irabazi berritan, sare sozialetan hamaika zorion agur jaso ditu Chourrautek.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

<b>Alaveseko kapitain Victor Laguardia, eskuak buruan, taldeak gola jaso eta gero.</b> ©ALEJANDRO GARCIA / EFE

Saririk gabeko hobekuntza

Eñaut Agirrebengoa

Alavesek punturik batu gabe jarraitzen du, Espanyolen zelaian galdu ostean. Aurreko lehietan baino duinago aritu da, baina garesti ordaindu du Duartek eginiko penalti garbia

Realeko futbol zuzendaria, hedabideen aurrean azalpenak ematen, Irailaren hasieran. ©z
 ©IDOIA ZABALETA / @FOKU

«Kosta egin zait onartzea amets handi bat utzi dudala bete gabe»

Julen Etxeberria

Buruz buruko finala jokatu edo ez ibili zen Iñaki Artola, eta, azkenean, hiru hilabete eta erdi pasatxo behar izan ditu berriz jokatzeko. «Oraingo ikuspegiarekin, garbi dugu ez genuela ikusi nahi izan zer-nolako lesioa zen», dio. «Gutxienez %90ean» ekin nahi dio lau eta erdikoari.
Athleticeko jokalariak, burumakur, Rayok 1-2koa sartu berritan. ©Aritz Loiola / Foku

Zuri-gorriek azken unean galdu dute Rayoren aurka

Julen Etxeberria

Falcaok 96. minutuan sartutako gol batek eman dio garaipena Andoni Iraolak entrenatutako taldeari San Mamesen. Athletic eskas aritu da

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Egin BERRIAlaguna

Irizpidea duzulako. Giroan zabiltzalako.

Zuk badakizulako.

Egin BERRIAlaguna