Albistea entzun

Ander Elosegi

«Emaitza ez da hain ona, baina egindako lana bai»

Ez du lortu nahi zuen emaitza, baina, hori alde batera utzita, bere gaitasunen neurriko jaitsiera egin ez duelako irudipena geratu zaio. Hala ere, uste du ondo prestatuta iritsi dela eta jaitsierak ondo planteatu dituztela.

Ander Elosegi, Tokioko Olinpir Jokoetan
Ander Elosegi, Tokioko Olinpir Jokoetan Enric Fontcuberta/EFE Tamaina handiagoan ikusi

Jakes Goikoetxea, Berriemaile berezia -

2021eko uztailak 28 08:25

Lehiaketa bukatuta, azken egunetako tentsioaren zama arindu egin zaio Ander Elosegiri (Irun, Gipuzkoa, 1987). Zortzigarren postua lortu zuen herenegun kanoen ur bizietako jaitsieran.

Zer-nolako gorputzaldiarekin jaiki zara, herenegungo finalean parte hartu eta gero?

Ondo. Kirolarioi askotan gertatzen zaizkigu horrelako gauzak, eta badakigu zer den. Onartu beharra dago. Zortzigarren postua lortzeak esan nahi du zazpi piraguista ni baino hobeak izan zirela.

Aho zapore mikatzarekin zaude oraindik?

Pixka bat bai, uste baitut finalean maila hobea eman nezakeela, finalerdian erakutsi nuen moduan. Pena ez dut postuagatik, baizik eta ezin izan nuelako nire maila eman. Maila ez ematea baino gehiago, uste dut pixka bat hobeto egiteko gai nintzela, baina ez nuela egin. Pena hori dut. Emaitza bera lortuko banu, baina beste jaitsiera batekin, beste sentsazio bat izango zen.

Tentsio handiko egunak izan dira. Gauean lo egin zenuen?

Bai. Gorputzak ere azken egunetako tentsio horretatik ihes egitea eskatzen du, lasai lo egitea, nahiz eta emaitza ez zen hain ona izan.

Animo mezu asko jaso dituzu?

Bai, espero baino gehiago. Eskertzekoa da; ikusten duzu jendea adi egon dela.

Buelta asko eman dizkiozu finalari? Zeure burua zigortu duzu, hobeto egin zenezakeelako?

Ez, egindakoa egina dago. Emaitza hori da. Aurrera begira, bai, egindakoa ondo aztertuko dugu entrenatzailearekin, batez ere ikusteko zer hobetu dezakegun, zer egin dugun ondo, zer ez...

Jaitsiera zehatz-mehatz aztertzen duzue?

Finala ez dugu momentuan bertan aztertzen, denboraldi berriari begira baizik, ikuspegi zabalago eta lasaiago batekin. Finalerdiaren azterketa, bai, hori han bertan egin genuen, finalari begira ea zerbait aldatu behar zen ikusteko.

Asko begiratzen zaio azken emaitzari. Zuek, ordea, emaitza baino gehiago, emaitza horretara iristeko egindako prozesu guztia aztertzen duzue?

Kanpotik, bai, emaitzari begiratzen zaio, baina autokritikak beste modu batekoa izan behar du.

Ez da ahaztu behar aurretik egindako lan onaren emaitza dela Olinpiar Joko batzuetan egotea. Ez da erraza.

Bai, jakina, guk ere hori badakigu, baina, hemen egonda, beti nahi dugu gehiago. Helburua garbia zen: domina lortzea. Hala ere, bagenekien oso zaila zela, eta horretarako gauzak ondo egin behar zirela. Horretan zentratu ginen, analisi on bat egiten, jaitsiera nola egin nahi genuen ondo zehazten. Alde horretatik, pozik gaude, lanak ondo egin ditugu. Egia da azken jaitsieran gauzak ez zirela hain ondo atera eta emaitza ez dela hain ona. Hala ere, egindako lana ona izan da, eta pozik gaude.

Finalean arriskatu egin behar da.

Arriskatu baino gehiago, finalerdiaren erreferentzia duzunez, badakizu zertan hobetu dezakezun, eta, finala izanda, denbora aurrezteko lekuak bilatzen saiatzen zara. Eslalomaren zailtasunarekin erraza da hutsak egitea, eta hori gertatu zitzaidan: hutsegite txiki batzuk pilatu zitzaizkidan; denbora galdu nuen, eta, gainera, ate bat jo nuen. Emaitza ez da hain ona, baina kirola da.

Jaisten ari zarela, horretan guztian pentsatzen duzu? Ondo zoazen, gaizki...

Badakizu, baina ezin zara horretan zentratu, bestela edozein huts txikirekin lehiatik kanpo geratuko zinateke, eta ezin da hori gertatu. Azkenean, 25 ate daude, eta beheraino iritsi behar da, nahiz eta jaitsiera ona ez izan. Dena eman behar da bukatu arte.

Jendea jabetzen da ur bizietako jaitsieren zailtasunaz? Ur-lasterrak, zurrunbiloak... eta, hala ere, ateetatik zentimetro gutxi batzuetara pasatu ahal izatea, ukitu gabe?

Ez dakit jendeak nola ikusten duen. Uste dut ez dela ikusten zer zaila den hor egotea; ziur aski, zailtasun hori ez da ondo ikusten, baina jendea jabetzen da ez dela batere erraza.

Beste lehiaketa batzuk ere izaten dituzue, baina Olinpiar Jokoak dira garrantzitsuenak. Bukatu eta gero, zama bat arindu izana sentitzen duzu?.

Bai, azken egunetako tentsioak eta urduritasunak nolabait ihes egiten dutela sentitzen da. Emaitza ona edo txarra izanda ere, denok sentitzen dugu bukatu dela. Orain, atseden hartu, eta hurrengora arte.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

<b>Alaveseko kapitain Victor Laguardia, eskuak buruan, taldeak gola jaso eta gero.</b> ©ALEJANDRO GARCIA / EFE

Saririk gabeko hobekuntza

Eñaut Agirrebengoa

Alavesek punturik batu gabe jarraitzen du, Espanyolen zelaian galdu ostean. Aurreko lehietan baino duinago aritu da, baina garesti ordaindu du Duartek eginiko penalti garbia

Realeko futbol zuzendaria, hedabideen aurrean azalpenak ematen, Irailaren hasieran. ©z
 ©IDOIA ZABALETA / @FOKU

«Kosta egin zait onartzea amets handi bat utzi dudala bete gabe»

Julen Etxeberria

Buruz buruko finala jokatu edo ez ibili zen Iñaki Artola, eta, azkenean, hiru hilabete eta erdi pasatxo behar izan ditu berriz jokatzeko. «Oraingo ikuspegiarekin, garbi dugu ez genuela ikusi nahi izan zer-nolako lesioa zen», dio. «Gutxienez %90ean» ekin nahi dio lau eta erdikoari.
Athleticeko jokalariak, burumakur, Rayok 1-2koa sartu berritan. ©Aritz Loiola / Foku

Zuri-gorriek azken unean galdu dute Rayoren aurka

Julen Etxeberria

Falcaok 96. minutuan sartutako gol batek eman dio garaipena Andoni Iraolak entrenatutako taldeari San Mamesen. Athletic eskas aritu da

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Egin BERRIAlaguna

Irizpidea duzulako. Giroan zabiltzalako.

Zuk badakizulako.

Egin BERRIAlaguna