Albistea entzun

HILBERRIA

Juan Mari Jauregi hil da, 13/13 sumarioko auzipetuetako bat

Uztailean Espainiako Auzitegi Nazionalean abiatutako auzi saioetara joateaz salbuetsi zuten, bere osasun egoeragatik. Torturak salatu zituen 2010eko apirileko atxiloketaren ondotik.

Juan Mari Jauregi, 2010eko ekainean, torturak salatzeko egindako agerraldi batean.
Juan Mari Jauregi, 2010eko ekainean, torturak salatzeko egindako agerraldi batean. Jon Urbe / FOKU Tamaina handiagoan ikusi

Maddi Ane Txoperena Iribarren -

2021eko irailak 3

Sortuk jakinarazi duenez, Juan Mari Jauregi militante independentista zendu da. 13/13 sumarioan auzipetua zeuden zortzi euskal herritarretako bat zen. Uztailean Espainiako Auzitegi Nazionalean hasi zen epaiketara joateaz salbuetsi zuten, haren osasun egoera zela eta. Torturak salatu zituen 2010eko apirilean atxilotu zutenean —atxiloketa horien ondorio da 13/13 sumarioa—. LABeko militante erretiratua zen orduan.

Sortuk eta 13/13ko gainerako auzipetuek «besarkada goxo eta sentikorra» eta elkartasuna adierazi diete Jauregiren senide eta hurbilekoei. 13/13ko auzipetuek adierazi dute «bereziki gogorra» egiten zaiela Jauregi agurtzea, «jakitun» daudelako «2010eko atxiloketak eta haren ondorengo ibilbide luzeak» haiengan guztiengan izaten ari diren eraginaz: «Guk bezalaxe, estatuen bortizkeria pairatu dugun euskal herritar guztiok dakigu zein sakona den eragiten digun zauria». 13/13ko auzipetuentzat «elkartasun, konpromiso eta duintasun eredu» da Jauregi, «bere bizitza osoan eta azken hatsera arte gure ondoan izan dugulako, bai gure sumarioaren atzean dauden estatu interesak salatzeko, nola presoei bere elkartasuna eta maitasuna adierazteko edo Euskal Herriaren aitortza aldarrikatzeko»..

Sortuk ere salatu du Jauregik «konponbide demokratikoaren alde apustu egiteagatik» pairatu behar izan zuen «infernua»: «Atxilotzean oso modu basatian torturatu zuen Guardia Zibilak Juan Mari, erabateko inpunitatez, bere lekukotzak erakutsi zuen moduan». Ezker abertzaleak gogoratu du 13/13 auzian epaitzen ari diren euskal herritarrak garai hartan «lanean» ari zirela EPPK Euskal Preso Politikoen Kolektiboa «agertoki berrira egokitzeko, presoak agertoki hartan eragile aktibo izan zitezen». Sorturen hitzetan, «estatuaren biolentziaren biktima» da Jauregi: «Torturak osasunari kalte egin ez ezik, sumarioa hamarkada batez luzatzeak oinazea areagotu baino ez zion egin».

Hilaren 12an, manifestazioa

Sortuk iragarri duenez, 13/13 makroepaiketaren aurka manifestazioa eginen dute irailaren 12an. 13:30ean abiatuko da, Donostiako Bulebarretik: «Bakea eta irtenbide demokratiko bat bilatu duten militante politikoen aurkako epaiketa politikoek behingoz amaitu behar dute. Oraindik indarrean den biolentziak, estatuaren biolentziak, amaitu egin behar du. Bada garaia».

«Biluztu egin ninduten»

66 urte zituen Jauregik 2010ean atxilotu zutenean, eta arritmia zeukan. Halaxe salatu zuen aske utzi ondotik Jose Luis Gallastegi eta Joxe Domingo Aizpuruarekin 2010eko ekainean egindako agerraldian: «Nire eritasunaz ohartu zirenean, esan zidaten han gelditzen banintzen, hiltzen banintzen, ez zela ezer gertatuko. [Jon] Anzarena bezala izango zela. Esan zidaten han ez nuela inolako eskubiderik, ni etsaia nintzela eta etsaia suntsitu egin beharra zegoela». Kontatu zuenez, Madrilera iritsi orduko begiak estali zizkioten, eta hotza pasatu zuen lehen galdeketan. «Biluztu egin ninduten. Zutik egon nintzen denbora guztian. Dardaraz hasi zitzaizkidan hankak, hotzaren, beldurraren eta nekearen ondorioz. Erortzear egon nintzen». Egoera horretan galdera eta mehatxuak etengabeak izan zirela salatu zuen. Bigarren egunean, berriz, beroa pasarazi zioten. «Itomena nuen. Berokia guztiz lotuta, begiak estalita eta begien estalkien gainetik beste kaputxa edo trapuren bat jarri zidaten». Beste norbaiten oihuak entzuten zituela azaldu zuen: oihuak, kolpeak, garrasiak, irainak... Haren alaba erditzear zegoen, eta hura atxilotuko zuten mehatxua ere egin zioten: «Nire emaztearen eta alabaren aurkako mehatxuak etengabeak ziren».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©EH BILDU

EH Bilduk estatutuaren «agortzea» nabarmendu du; PSE-EEk, ekarpenak

Maddi Ane Txoperena Iribarren

Urkulluk azaldu du «bete gabe» dagoela eta 30 eskumen lekualdatzeke daudela oraindik ere. PPk estatutuaren «deuseztatze» nahia salatu du

Urkullu, gaur, herritarren galderak erantzuten. ©Irekia

Urkulluk esan du «bateragarriak» direla pentsio minimoa hobetzea eta AHTa egitea

Edu Lartzanguren

Herritarrek eginiko hogei galderari erantzun dio Iñigo Urkullu lehendakariak, '#UrkulluTopaketa' egitasmoaren barruan.

ERCko eledun Marta Vilalta. ©Toni Albir / EFE

ERC: aurrekonturik ez, ez bada ikus-entzunezkoetan %7,5 bermatzen katalanarentzat, euskararentzat eta galizierarentzat

Edu Lartzanguren

Esquerrak ohartarazpena bidali dio Espainiako Gobernuari, eta ostiralera arteko epea eman dio gaztelera ez diren hizkuntzentzako kuota ezartzeko Ikus-entzunezkoen Legean.

ETArena izan zitekeen aspaldiko zulo bat aurkitu dute Ataunen

ETArena izan zitekeen aspaldiko zulo bat aurkitu dute Ataunen

Berria

Herritar batek aurkitu zuen Aitzarte edo Ataungo Domoan.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.